Две години по париската климатска конференција КОП21 и усвојувањето на договорот против глобалното затоплување, утре во Париз се одржува “One Planet Summit”. Средба на која се најавени десетици светски лидери во потрага по начин за финасирање на климатската акција која бара итно ослободување од јагленот и другите фосилни горива.
Цел на конференцијата, во ко-организација со Обединетите Нации и Светската банка, е како да се натераат светските финансиери да почнат да инвестираат во “зелена енергија” и да ги поддржат земјите од југот на планетата што најмногу стрдаат од промените на климата.
Во Париз се најавени лидери на повеќе европски, афрички и јужно-американски земји, првите луѓе на ОН и на Европската комисија, потоа Леонардо Ди Каприо, актер и еколошки милитант како и повеќе инвеститори и газди на богати фирми. Но во Париз не доаѓаат лидерите најголемите загадувачи како Кина, Индија, Канада или САД, земјата што се повлече од климатскиот договор. Овие земји ќе бидат претставени на министерско ниво додека САД ќе ги претставува американски дипломат од амбасадата во Париз.
Последните научни студии на ГИЕК (Група меѓувладини експерти за еволуција на климата) потврдуваат дека големиот број урагани и пожари во изминатата година се последица на затоплувањето и најавуваат дека нивниот број ќе продолжи да се зголемува.
Според проценките, за запирање на затоплувањето на светот му се потребни 90 милијарди долари до 2030 година. Сумата е огромна но овие инвестиции би изнесувале одвај 5 отсто од инвестициите кои секако се реализираат. Оттука е идејата за оваа конференција што треба да ги реориентира инвестициите.
Eден извештај на повеќе невладини организации вели дека банките за развој и јавните институции од земјите на групата Г20, трошат годишно 72 милијарди долари за проекти поврзани со фосилни енергенски како јагленот а четири пати помалку за «зелена енергија».
Во 2015 година во Париз меѓународната заедница се согласи дека температурата на планетата треба да се задржи под критичното ниво од +2 степени споредено со прединдустрискиот период. Но државите не ги остваруваат обврските преземените во Париз па така температурата во моментов изнесува +3 степени.