Светската здравствена организација (СЗО) денеска предупреди дека недостасуваат шест милиони медицински сестри во светот кој се соочува со глобална пандемија на коронавирусот. Агенцијата при Обединетите нации (ОН) заедно со здруженијата „Nursing Now“ и „International Council of Nurses“ (ИЦН) во своите извештаи ја истакнуваат клучната улога на медицинските сестри кои го сочинуваат 50 отсто од медицинскиот персонал на планетата.
„Медицинските сестри се ‘рбетен столб на секој здравствен систем“, рече првиот човек на СЗО, Тедрос Адханом Гебрејесус.
Според статистиката на организацијата, во светот има околу 28 милиони медицински сестри чиј број е зголемен за 4,7 милиони во периодот од 2013 година до 2018 година.
„Но, тоа е сè уште помалку за 5,9 милиони од потребното“, се наведува во извештајот.
Најголем недостаток на медицински сестри е едидентитан во сиромашните земји во Африка, во југоисточна Азија, на Блискиот исток и во делови на Јужна Америка.
Дефицитот на медицински сестри на глобално ниво, според шефот на ИЦН, придонесува за пораст на стапката на зарази, медицински грешки и пораст на стапката на смртност. Исто така предупредува дека тој проблем резултира со исцрпеност на вработените медицински сестри.
Претседателката на здружението „Nursing Now“, Мери Воткинс, пак, повика на сеопфатни тестирања на здравствените работници во актуелната ситуација со коронавирусот. Тврди дека голем број од нив не одат на работа, бидејќи стравуваат дека се заразени, а не можат да го докажат тоа.
Во Италија, на пример, од ковид-19 починаа 23 медицински сестри, девет отсто од вкупниот медицински персонал е заразен, додека од Шпанија пристигнуваат вести дека 14 отсто здравствени работници се заболени со коронавирусот.
Извештај, исто така, укажува дека богатите земји не школуваат доволен број на медицински сестри поради што ги увезуваат за да ги задоволат своите потреби. Тоа, како што се наведува, само ја засилува кризата во сиромашните држави.