Увозните давачки во март во просек бележат намалување за 10 проценти во споредба со минатата година, поради кризата, намалената потрошувачка на акцизна стока, но и намалената цена на нафтените деривати. Прекуграничната трговија се одвива без проблеми, кај извозот бројките покажуваат зголемување кај свежиот зеленчук и овошјето. Ова го соопшти директорот на Царинската управа Ѓоко Танасоски на денешната прес-конференција.
Како што соопшти, вредноста на извозот во јануари-март оваа година изнесува 86,77 милијарди денари или 1,41 милијарда евра што е за 210 милиони евра повеќе во однос на 2019 година. Вкупната количина на извезена стока, пак, изнесува 702.650 тони.
Според Танасоски, и покрај исклучително тешките услови, извозот на свеж зеленук во март годинава е зголемен за 3.000 тони во однос на 2019 година, додека пак кај вредноста се бележи одредено намалување и изнесува 290 милиони денари или околу 4,7 милиони евра. Извозот на свежо овошје во март е поголем за милион евра во однос на 2019 година кога изнесувал 3,7 милиони евра или 9.126 тони.
„Како резултат на дигиталната царина и воведувањето нов софтвер, од 1 април царинската постапка е целосно без хартија. Тоа практично значи дека секој извозник покрај тоа што не треба да поднесува хартиена царинска декларација, не е потребно да ги поднесува и другите царински документи. На овој начин придобивките покрај олеснување на трговијата во ова кризно време придонесуваат и за избегнување на физичкиот контакт“, истакна Танасоски и додаде дека царинењето може да се изврши во рок од 24 часа.
Потсети дека сите информации се достапни на економските оператори, на воведените т.н. „зелени коридори“ за обезбедување 24 часовна работа на граничните региони во рамки на ЦЕФТА регионот и клучните гранични премини со ЕУ, како и листа на приоритетни стоки.
Меѓу мерките за олеснување на работата на економските оператори ги наведе продолжениот рок на одобренијата за поедноставени постапки до 30 септември оваа година, укинување на царинските давачки на потрошен медицински материјал, лекови и суровини за производство, укинување на царинската давачка за замрзнато свинско место, можност за одложување на плаќањето на царина, ДДВ и акциза, продолжување на важноста на банкарските гаранции, а поедноставена е постапката за реиздавање одобренија за повластените корисници на етилалкохол.
Танасоски истакна дека во март е регистриран пад на наплатата на акцизите, а со тоа и на увозното ДДВ во просек од 10 проценти.
„Во споредба со минатата година, наплатата е намалена за 654 милиони денари и сето тоа се должи на намалувањето на потрошувачката на акцизната роба и согласно тоа повлекува и одредени намалувања на цената на нафтените деривати“, истакна директорот на Царинската управа.
Тој посочи дека во овој период се поднесени шест кривични пријави до ОЈО по различни основи, за фалсификување исправа и за интелектуална приватна сопственост.