Зголемувањето на доплатата што ја плаќаат пациентите за нови референтни цени на лековите која требаше утре, сабота, да стапи на сила, го поништи денес министерот за здравство Арбен Таравари.
Ова решение ексминистерот за здравство Никола Тодоров го потпишал на 30 мај, еден ден пред заминување од функцијата.
„Одлучив да преземам конкретни мерки за поништување на ова решение за кое управниот одбор на Фондот за здравство донел одлука на 26 мај годинава, а одлуката е излезена во “Службен весник” на 9 јуни. Донесов одлука за поништување, бидејќи ќе удреше по џебот на пациентите”, рече Таравари на денешната прес-конференција.
ВМРО-ДПМНЕ реагираше на оваа одлука и го критикуваше новиот министер за здравство кој, според партијата “покажува непознавање на областа за референтните цени на лековите од позитивната листа – за примарна и болничка здравствена заштита која се утврдува согласно законските прописи. Утврдувањето на референтните цени на лековите се врши според компаративна методологија на Фондот за цени на лекови” вели ВМРО-ДПМНЕ.