„Вистината за ДУИ” e името на кампањата што денес ја почна градоначалникот на Гостивар, Арбен Таравари. Тој најавува дека ќе држи повеќе прес-конференции на кои ќе ги обелоденува сите злоупотреби, случај по случај, извршени од страна на поранешното раководство на Општина Гостивар, а кои ги констатирала внатрешната ревизија.
– Има полно скандали, почнувајќи од полицијата, образованието, областа на урбанизмот, работата на општинската администрација и така натаму. Неколку внатрешни ревизии веќе се завршени, некои се во тек, а со ревизии ќе се продолжи сè додека не се открие и последната злоупотреба. Денес, пред вас ќе го обелоденам случајот со кафетеријата кај ЈПССО „Риниа” – Гостивар. Овој локал му е изнајмен на лицето Гази Фејзи за надоместок од само 5.000 денари месечно и тоа за период од 20 години. А најскандалозен е фактот што оваа кафетерија го блокира влезот на спортската сала каде што се одржуваат натпревари во првата кошаркарска лига и се собираат повеќе од 2.000 гледачи на кои им се загрозува безбедноста. Второ, истата кафеана користи електрична енергија и вода од спортската сала, значи тоа го плаќаат граѓаните на Гостивар, вели Таравари.
Тој исто така кажа и оти со пари од Јавното претпријатие, се плаќале и одредени даноци и такси на кафетеријата.
Таравари рече дека во надлежност на општината е да се утврдат злоупотребите преку ревизија и да се сигнализира до надлежните истражни органи а тие треба да побараат одговорност.
Градоначалникот на Гостивар зборуваше и за обвиненијата од поранешниот градоначалник Бејта за предложениот буџет за 2018 година.
– За мојот кабинет се предвидени околу 15 илјади евра помалку од поранешниот градоначалник Невзат Бејта за 2017 година, а и другите непродуктивни расходи предвидени за буџетот за оваа година се пониски во споредба со буџетите од претходните години, рече Таравари.
Тој исто така, посочи и дека е отворен за соработка и оти ќе направи се што е во негова моќ за да почне советот да одржува седници.