При денешното рочиште за случајот „Тврдина-Таргет” на СЈО, одбраната на Сашо Мијалков се повика на амнестија на претседателот Иванов, но судот го одби барањето.
Судијката Џенета Бектовиќ го одби барањето на адвокатот Љупчо Шврговски и порача дека судот го ценел обвинението и ги одбил приговорите за прифаќање на помилувањето.
Денешното рочиште започна со задоцнување од 40-ина минути поради недоразбирање во врска со одлагањето на терминот заради претходното судење за „Монструм“.
Обвинителот Трајче Пеливанов од СЈО побара да се отповика претходното решение за раздвојување на постапката за Гордана Јанкулоска и повторно да се спои постапката, бидејќи Јанкулоска веќе се јавува на други рочишта и престанала причината заради која била раздвоена постапката.
Судот одлучи на наредното рочиште да донесе решение за повторното спојување на постапката за Јанкулоска и прво да ја почека одлуката на Апелација за Горан Грујоски.
Во овој предмет обвинети се поранешниот началник на Петтата управа во МВР Горан Грујевски и вработениот во УБК Никола Бошкоски, кои се во бегство во Грција, поранешната министерка за внатрешни работи Гордана Јанкулоска и поранешниот директор на УБК Сашо Мијалков, како и поранешниот шеф на неговиот кабинет, Тони Јакимовски.
Ристовска: Мијалков бил организатор, но и самиот прислушувал
Обвинителката Ленче Ристовска рече дека СЈО обезбеди голем број на материјални докази и искази на сведоци кои ја разрешуваат дилемата кој, на каков начин со кои средства и мотиви го вршел незаконското прислушување. Ќе докажат дека е сторено кривичното дело злосторничко здружување и злоупотреба на службена положба и овластување.
-Кога тогашниот лидер на опозицијата Зоран Заев почна да објавува материјали од прислушуваните разговори, на граѓаните само им се потврди она што веќе со години наназад им беше јасно и поради што при секој телефонски разговор велеа ” не по телефон, можеби не слушаат”, рече обвинителката Ристовска.
Таа ги опиша улогите и задачите кои ги имале обвинетите, но истакна дека и идеотворецот на масовното прислушување е тогашниот директор Сашо Мијалков, кој се водел од политички и бизнис интереси.
-Во текот на предистражната постапка обезбедени се голем број на докази и сведоци, кои ја разрешија дилемата и мотивот кој го вршел прислушувањето, рече обвинителката.
Во продолжение обвинителката опиша како течело нелегалното прислушување.
-Ќе докажеме дека Сашо Мијалков, Горан Грујевски и Надица Николиќ, раководени од желбата за сеопфатна контрола на протекот на информациите, а како би оствариле предност во политичката и бизнис сферата, формирале злосторничко здружувањекое преку континуирана злоупотреба на системите за следење на комуикациите со кои располага УБК вршеле масовно нелегално прислушување, истакна обвинителката.
Таа појасни дека на ова злосторничко здружување се приклучиле и обвинетите Владимир Варелов, Васил Исаковски, Маријан Шумоликовски и тројца сведоци, меѓу кои и Звонко Костовски, при што секој имал своја задача.
-Обвинетиот Мијалков како директор на УБК бил организатор на групата и ги држел под контрола и надзор сите учесници, а воедно и самиот незаконски ги следел комуникациите на дел од граѓаните, а имал и преглед на сите броеви кои биле следени. Грујевски како негов најблизок соработник ги проследил барањата и намерите на Мијалков до Николиќ, која ги распоредувала улогите на другите учесници.Таа давала и задачи кои телефонски броеви треба да бидат таргетирани и транскрибирани.
Она што денес се дозна од воведниот говор на обвинителката е и дека Звонко Костовски, кој заедно со Ѓоко Лазаревски ја открија аферата, и самиот учествувач во прислушувањето.
-Звонко Костовски бил задолжен за техничката поддршка на незаконското следење на комуникациите, изработувал профили и лозинки на корисниците, а воедно на секој создвач му овозможил пристап до системот за следење на комуникациите. На Мијалков и Грујевски ваков пристап им овозможил и во нивните канцеларии, односно имале пристап до разговорите од своите канцеларии, појасни Ристовска.
Истрагата за предметот „Тврдина“ беше отворена на 29 март 2016 година, а за предметот „Таргет“ на 17 ноември 2016 година, а поради нивната поврзаност се споени во еден предмет. Обвинението е подигнато на 30 јуни 2017 година.
Според обвинителниот акт, преку три системи за следење на комуникациите во УБК, во периодот од 2008 до 2015 година незаконски биле следени 4.286 телефонски броеви за кои воопшто не биле издадени судски наредби. Комуникацијата била следена пред да бидат издадени и по завршување на траењето на важноста на судските наредби на 1.541 број или вкупно 5.827 телефонски броеви. Прислушувани биле над 20 илјади граѓани.
Судечкиот совет на 19 јуни одлучи да се раздвои постапката за обвинетите Грујевски и Бошковски, а да продолжи против останатите обвинети во овој случај. Претходно судечкиот совет ја раздвои и постапката за екс министерката Гордана Јанкулоска.