Според Индексот на перцепција на корупција, Македонија бележи фрапантен пад од 24 места и од 2015 година, во 2016 е рангирана на најниското досега за нас – 90 место.
Индексот кој денес го објави „Транспаренси Интернешнл“, покажува дека од 176 земји колку што се рангирани во 2016 година, најдобар резултат имаат Данска и Нов Зеланд.
Ако се анализираат податоците за земјите од Балканот, Македонија е најлошо рангирана, а воедно е и дел од десетте земји кои бележат најголеми падови во однос на претходните рангирања во ист кош со земји како Мозамбик, Тринидад и Тобаго, Белорусија, Суринам и други. Словенија од друга страна е лидер на Балканот.
Според првата жена на Транспаренси Интернешнл во Македонија, Слаѓана Тасева, проблемот со корупцијата ескалира додека власта ги занемарува сите укажувања за овој проблем.
– Владата на Република Македонија, која повеќе години водеше политика заснована на клиентелизам и интереси, не само што ги занемаруваше сите укажувања за ескалација на проблемот со корупцијата, туку со воспоставување на системот на заробена држава го оневозможи работењето на институциите задолжени за борба со корупцијата, констатира Тасева.
Таа апелира дека овој систем мора да се промени што поскоро со систем во кој ќе владее правото, додека институциите ќе бидат ефикасни и ќе преземат сериозни мерки за справување со корупцијата како проблем од висок приоритет.
Истражувањето го презентира Дона Димов, истражувач на ТИ
Индексот на перцепција на корупцијата се прави врз основа на проценката на експертите, претставници на институциите и на бизнисмените, заедно со истражувањето што го спроведува секоја од седум меѓународни организации.
За анализата од 2016 година, земени се резултатите од седум нови истражувања кои покажуваат дека корупцијата е согледана како сериозен проблем за развој на економијата, за владеењето на правото, за странските инвестиции и за стабилноста на демократијата.
– Недопирливоста на одговорните за корупција е секојдневие кое треба да се искорени а ланецот на корумпираност во високите ешалони на сите власти да се прекине. Тоа е одговорност на Претседателот на државата, на новоизбраните пратеници, на оние кои ќе формираат влада, на вработените во институциите и судството, вели Тасева.