Четириесеттина вработени во штипската конфекција „Алкон-Текс“ излегоа на протест пред седиштето на компанијата од каде повикаа да им бидат исплатени платите и придонесите за месец април. Се пожалија за притисоците со кои, како што велат, секојдневно се соочувале. Алармираат оти во ек на пандемија, платите им биле намалени иако работата течела со вообичаено темпо.
„Работевме во карантин без прекин, луѓето се разболуваа, откази се делеа, а притисокот и мобингот станаа секојдневние. Се регистрираат нови фирми за преку нив старите да се ослободат од вишокот на вработени. Субвенции од државата редовно се земаат ама пари за плати нема “, вели вработена во фирмата.
Работничките тврдат дека од менаџментот им бил вршен притисок да потпишат документи со кои од „Алкон-текс“ се префрлаат во друга фирма.
„Капиталот не може туку така лесно да се префрла од една на друга фирма. Мора да има потекло на парите, знаеме дека тоа институциите може да го следат и да откријат каква злоупотреба им е направена на работничките кои се денеска тука“, рече Благоја Ралповски од Конфедерацијата на слободни синдикати.
Поддршка за работничките дадоа и од Здружението „Гласен текстилец“. Кристина Ампова посочи дека работничките псотојано се соочуваат со притисок од страна на раководството кое им наметнувало да потпишат спогодбени откази.
Фото: Фејсбук профил на Хелсиншки комитет за човекови права