За обвинителите Гордана Гешковска и Јован Цветановски од скопското обвинителство и за Златко Биковски, од организиран криминал пред празникот е отворена дисциплинска постапка поради сомнеж дека направиле пропусти во истрагата за настаните од 27 април лани, објави Телма повикувајќи се на ЈОРМ.
Тие се раководителка и заменик раководител во скопското обвинителство и раководител на обвинителството за гонење организиран криминал и корупција.
Обвинителите се товарат дека не извршиле увид на местото на крвичниот настан, односно во Собранието каде лани на 27-ми април се случи упадот и беа повредени над 100 луѓе.
Комисијата која ја води постапката, доколку утврди дисциплинска одговорност има можност да ги казни со опомена, парично или дури и да им врачи отказ.
Обвинителите се земени на дисциплинска затоа што според обвинителството не извршиле увид во Парламентот по упадот на крвавиот честврток.
Телма се повикува на информацијата објавена во емисијата КОД дека вечерта на 27-ми април бил организиран состанок кој го свикал тогашниот државен обвинител Марко Зврлевски, каде присуствувале овие тројца обвинители. Не бил свикан колегиум во кој членуваат и виши обвинители, туку работата и истрагата е префрлена на дежурните обвинители во скопското обвинителство.
На оваа средба било одлучено да не се оди веднаш на увид, поради безбедноста на обвинителите. Имало и обвинители кои тврделе дека не треба да се врши воопшто увид, туку прво да се разгледува изборот на Талат Џафери за собраниски претседател, а дури потоа насилствата и упадот. Најголем дел од овие обвинители кои не сакале да се врши увид сега не се под дисциплинска постапка.
Ден по 27-ми април, двајца обвинители вршеле увид и ја заклучиле собраниската прес сала каде беа нападнати пратениците на новото владеачко мнозинство. Но дотогаш веќе биле изнесени компјутерски хард дискови со снимките на кои се гледа како пратениците на ВМРО- ДПМНЕ Мукоски и Василевски ги отвораат собраниските врати и ја пуштаат групата внатре. После тоа увид не е е вршен, се до јули 2017-та кога предметот е предаден на обвинителството за организиран криминал кое врши обвинителски увид на лице место.