Телма излезе со одговор после демантот на проф. Александар Климовски, а кој се однесува на веста “Макпетрол ќе го тужи за клевета професорот од Правниот факултет, Александар Климовски”, што ја објави НОВА вчера повикувајќи се на она што го објави телевизија Телма, дека од страна на Макпетрол АД добил тужба за клевета бидејќи во интервју за порталот мкд.мк „изнел невистинити тврдења што нанесуваат огромна штета на компанијата и на угледот стекнуван и граден повеќе десетлетија“.
Професоре А. Климовски – ЕЕЗ не е невладина организација По вчерашната информација на ТВ Телма дека Макпетрол ќе го тужи професорот Александар Климовски за клевета изнесена во негово интервју за интернет портал, и реакцијата на ТВ Телма за дисквалификациите кон нас од негова страна изнесени во тоа интервју, професорот повикувајќи се на член 14 од Законот за граѓанска одговорност за навреда и клевета, испрати барање за објавување на демант.
Со оглед на фатктот дека во информацијата на ТВ Телма не е содржана никаква клевета спрема професорот Александар Климовски , во смисла на одредбите на член 14 од цитираниот закон, ТВ Телма нема намера да одговори на неговото барање за објавување на таканаречениот демант. Ниту имавме, ниту имаме намера да ги анализираме стручните квалификации на професорот Климовски. Но не можеме а да не забележиме дека професорот, со сиот свој стручен беграунд, е недоволно информиран дека Европската енергетска заедница не е „периферна или невладина организација лобист на Макпетрол“, како што тој тврди во интервјуто за интернет порталот, туку е меѓународна организација формирана со меѓународен договор во 2005 година.
А главната цел на формирањето на енергетската заедница е взаемно делување на Европската Унија и земјите од Југоисточна европа и проширување на внатрешниот енергетски пазар на ЕУ кон овие земји. Овие информации професорот лесно можел да ги дознае, како и фактот дека Македонија е потписник на Договорот за формирање на Заедницата, и е нејзин член од 1 јули 2006 година и дека токму преку ЕЕЗ земјите членки како обврзувачки ги превземаат сите директиви на ЕУ од енергетската сфера. Инаку, преку Енергетската заедница и нејзините тела, Брисел следи колку земјите се усогласени или ги следат европските регулативи од енергетскиот сектор, а не преку Европската енергетска комисија, како што тој вели, бидејќи такво тело не постои, а професорот веројатно мислел на Генералниот директоратот за енергетика, се вели во одговорот на Телма до Климовски.