Хуан Мартин дел Потро, и дефинитивно, нема да настапи на Австралија опен во 2017 година. Аргентинецот го образложи отсуството во Мелбурн со недоволно време за опоравување и подготовка за стартот на новата сезона.
По повредите што го мачеа во 2014 година и во 2015 година, тој се врати на тениските терени во оваа сезона на најдобар начин. Играше во финале на олимписките игри во Рио де Жанеиро и триумфира со Аргентина во Дејвис купот по победата над Хрватска со Загреб.
Во 2016 година почна од 1.042 место на АТП листата, а ја завршува како 32 светски рекет. Изминатите 12 месеци прослави неколку големи победи како против Енди Мареј, Новак Ѓоковиќ, Рафаел Надал, Стан Вавринка.
„Со големо разочарување соопштуваме дека Хуан Мартин дел Потро нѝ потврди дека го откажува учеството на Австралија опен поради проблеми со формата. Притоа наведе дека немал доволно време за опоравување, па затоа се повлекува и од турнирот во Оукленд“, наведоа организаторите на настанот во Нов Зеланд што почнува на 9 јануари.
Дел Потро пред неколку дена и самиот ја најави можноста за повлекување од Австралија опен од 16 јануари до 29 јануари.
„Тенисот ме чекаше две години, Австралија опен може да почека уште една“, рече тогаш Аргентинецот.