Новак Ѓоковиќ нема да биде меѓу најдобрите четири тенисери на ранг листата што АТП ќе ја објави во понеделник. Србинот го напушта водечкиот квартет за првпат по десет години како последица на повлекување од претстојниот Роџерс купот поради повреда на лактот што, како бранител на титулата, ќе значи одземање на 1.000 бода.
Четвртото место го презема Стен Вавринка, а триото Мареј, Надал и Федерер ќе остане на бодовите што ги впишаа по Вимблдон бидејќи лани не настапија во Канада.
Падот на Ѓоковиќ беше неминовен по неуспешниот атак по титулите во Мадрид и на Ролан Гарос во мај. На Вимблдон се појави прилика за враќање и на лидерската позиција на АТП листата меѓутоа повредата на лактот го принуди да го предаде четврт-финалето на Томаш Бердих. Покрај Роџерс купот, крајно неизвесен е неговиот настап и на Ју-Ес опен на кој треба да брани поени од ланското финале.