Австралиската тениска ѕвезда Ник Киргиос побара психолошка помош и неговата суспензија во траење од осум недели ќе биде скратена, објави АТП.
АТП на почетокот на овој месец го казни 21 годишниот Киргиос со казна во висина од 25.000 долари и условно го суспендира на осум недели ако тенисерот не побара помош откако во мечот од второто коло на Мастерсот во Шангај против Мише Зверев се расправаше со судијата и публиката, пушташе поени, глумеше дека не може да врати лесни сервиси и сервираше неверојатно лошо.
АТП објави дека ќе му ја скрати казната на три недели ако Австралиецот побара помош од психолог.
„Ник се согласи да биде дел од програмата која му ја понуди АТП. Деталите и содржината од програмата се строга тајна“, вели АТП во своето соопштение и сега се чини дека 13. тенисер на светот ќе може повторно да се натпреварува од 7. декември.
Но, неговата сезона сега е готово бидејќи нема веќе турнири на распоредот оваа година, освен завршницата на АТП во Лондон на која не се квалификуваше.
Киргиос е познат по својот лош табиет на теренот, но ова му е прв пат заради својот нарав да добие казна и суспензија. Би требало после оваа санкција и психолошката помош да се смири?!
https://www.youtube.com/watch?v=3k2RppSjgEM