Обвинителите од Специјалното јавно обвинителство на денешното рочиште на завршните зборови за случајот „Тенк“ на кој во одвоена постапка и се суди на екс министерката за внатрешни работи Гордана Јанкулоска, побараа таа да биде прогласена за виновна, бидејќи со умисла извршила злоупотреба на службената положба за набавка на екстралуксузниот „мерцедес“.

-Обвинетата Гордана Јанкулоска при набавката на возилото ‘мерцедес ес 600 гард’ била свесна за своето дело и сакала извршување на истото. Таа го поттикнала Поповски незаконски да го фаворизира ‘Макаутостар’ за да се набави ново блиндиранo возило по желба на тогашниот премиер, Никола Груевски. Бараме обвинетата да биде прогласена за виновна земајќи ги предвид сите олеснителни и отежителни околности, а со тоа да бидат платени и 313 илјади денари судски трошоци солидарно со Груевски и Поповски, рече обвинителката Фатиме Фетаи.

Според Фетаи, поранешната министерка за внатрешни работи инсистирала информацијата за набавениот „мерцедес“ да се чува во тајност и надвор од МВР, за да не го гледале вработените и јавноста. Фетаи исто така рече дека техничките спецификации за возилото „мерцедес ес 600 гард“, претходно по пошта биле доставени до Поповски, за да се направи тендер идеален само за овој автомобил, исфрлувајќи ги другите конкурентски автомобили.

Адвокатката на Јанкулоска Сања Алексиќ рече дека СЈО не успеале да докажат дека во „бомбите“ гласот е на Јанкулоска и дека имале селективен пристап при изнесувањето на доказите во доказната постапка.

Во моментов говори адвокатото Боро Тасевски, а судијката Добрила Кацарска треба да одреди датум кога ќе биде соопштена пресудата.

За овој случај веќе е осуден поранешниот помошник-министер во МВР Ѓоко Поповски на шест години и шест месеци затворска казна, а поранешниот премиер Никола Груевски, како поттикнувач за извршување на делото, е осуден на две години казна затвор. За Груевски се очекува Апелација да ја соопшти одлуката по неговата жалба.