Аја Софија повторно ќе биде џамија. Така одлучи Врховниот управен суд на Турција, со што е поништена одлуката на основачот на модерната држава, Кемал Ататурк, кој овој храм во 1934 година го направи музеј. Раскошната градба во Истанбул цели девет века беше централна византиска црква, сè до падот на Цариград во 1453 година, кога во периодот на Османслиското царство беше џамија.
„Сегашната одлука на судот нема врска со религиозни прашања. Оваа одлука е продолжување на политиката на провокации што турскиот претседател Ердоган ја следи во последните години“, вели Константин Николакопулос, професор по православна теологија, за „Дојче Веле“.
Тој е свесен дека пренамената на Света Софија ќе ги погоди сите христијани, особено православните.
„Ова е всушност насочено против целиот западен свет. Тоа е демонстрација на моќ. Ердоган сака да покаже дека Турција е велесила и оти не се плаши од никого. Секако дека во мотивите спаѓаат и национализмот и фундаменталниот исламизам“, вели Николакопулос, кој предава на минхенскиот Универзитет Лудвиг Максимилијан.
Професорот вели дека протестот однадвор, на пример од Франција и од Русија, дошол предоцна и бил премногу благ.
„А Германија избегна да заземе јасна позиција. УНЕСКО дури во четвртокот објави соопштение во кое од Ердоган бара, а ја би рекол дека го моли, да не го прави тоа. Притоа сите знаеjа уште од 2 јули кога судот објави дека турскиот претседател со едноставен потпис може ја претвори Аја Софија во џамија“, додава Николакопулос.
Тој верува оти Света Софија навистина ќе биде користена како џамија и дека УНЕСКО и некои држави можеби ќе можат да договорат во одредени денови во неделата и натаму да биде отворена како музеј.
