Автор: Михаил Мице Бошковски
Оваа петчлена doo wop група (ду уоп е карактеристика за црнeчките вокални групи базирани на ритам и блузот, особено актуелни во 50-тите и првата половина на 60-тите години на минатиот век), е една од најпопуларните во своето време.
Формирана е во Лос Анџелес во 1953 година. Се додека за неа не се заинтересирал Бак Рам, таа нема позначајни успеси. А Бак Рам (1907 – 1991), е неверојатно музички надарена личност. Музички високо образован со завршен правен факултет. Но, со правото никогаш не се занимавал.
Тој најверојатно би бил врвен виолинист, ако не ја скршел раката играјки фудбал како дете. Потоа свирел на саксофон, но своите вистински музички квалитети ги покажал како композитор, аранжер, текстописец, музички педагог и менаџер.
Иако неговата музичка преокупација била насочена кон класичната музика, тој со голем успех пишувал аранжмани за џез величините како што се: Дјук Елингтон, браќата Дорси, Каунт Бејзи и други.
Кога ги презема „Плетерси“ тој веќе зад себе има скоро 30 годишно музичко искуство. Прво што направил, е промената на некои членови во групата. Сметал дека во групата мора да се најде место за извонредниот пејач Тони Вилијамс и за пејачката Зола Тејлор, а покрај нив групата ја сочинуваат Дејвид Линч, Пол Роби и Херб Рид. Во овој состав групата ги постигнува најголемите успеси од средината на 50-тите, па до крајот на деценијата.
Од тој период потекнуваат „Only You“ (1955) која станува светски хит (во 1974 година ја снимаат Ринго Стар и Џон Ленон), како и песната „The Great Pretender“ издадена истата година ( во 1987 г. ја снима Фреди Меркјури и достигнува 4-то место на британската топ листа, а ја снимиле и Џин Питни, Доли Партон, Сем Кук, Рој Орбисон и др.).
И двете песни стануваат дел од култниот музички филм од тоа време „Rock Around The Clock“ снимен според истоимениот хит на „Бил Хели и неговите комети“.
Покрај овие два хита „Плетерси“ доживуваат ѕвездени мигови и со насловите „My Prayer“ (песна од 1939 година која доживеала безброј изведби), „Smoke Gets In Your Eyes“ (позната композиција на Џером Керн од бродвејскиот мјузикл „Роберта“ од 1933 г., подоцна изведувана како џез стандард од најпознатите пејачи во тоа време), „Twilling Time“, „Harbur Lights“, „The Magic Touch“, „To Each His Own“, „If I Didn’t Care“ и уште многу други познати стандарди и компонирани песни од Бак Рам.
И како што обично бива, во екот на најголемата слава, групата ги има првите проблеми. Во 1959 година се уапсени четворицата машки членови и обвинети за заведување на малолетнички. Не се осудени, но тоа многу се одразува на нивната популарност, на посетеноста на концертите и на продажбата на плочи.
Следната 1960 година ги напушта соло пејачот Тони Вилијамс (1928 – 1992), кој претставуваше препознатлива звучна слика на групата. Тогаш, најверојатно и на Бак Рам му беше јасно дека работите не одат на добро.
Тони Вилијамс, си ги прецени можностите. Тој беше одличен пејач и тоа го докажа како член на групата, но како солист, едноставно за кратко време беше заборавен.
Во 1962 година групата ја напушти и единствениот женски вокал Зола Тејлор (1938 – 2007), но и таа подоцна не направи ништо значајно на полето на музиката. И покрај овие клучни промени, групата продолжува да постои со нови членови, но нема веќе големи хитови.
Само на неколку наврати во 60-тите се појавува на американскиот топ 100. Претстои период кога членовите се тужат на суд за тоа кој го поседува правото на името на групата. Судските процеси траат долго, тие стареат, а славата на групата постепено се губи.
Но, некои од нив продолжуваат да работат и да одржуваат концерти и турнеи користејќи го името и старата слава. Една таква постава своевремено гостуваше и во Скопје, а единственото заедничко со некогашните „Плетерси“ им беше името.
Постои фрапантен податок кој покажува дека во долгогодишното постоење на групата имало преку 120 измени во поставите. Името на „Плетерси“ многу пати е злоупотребено, па дури и се продаваат неоригинални снимки под нивно име.
Оригиналните нивни снимки единствено можат да се најдат како изданија на дискографската куќа „Mercury“.
Групата до скоро беше се уште активна под водство на Херб Рид единствениот од оригиналната постава кој почина во 2012 г. Во 1990, и 1998 г. примени се во „Куќата на славните“ како рок изведувачи и како вокална група.