Американецот Редмонд Џерард е нов олимписки шампион во сноуборд дисциплината слоупстајл. Падовите во првите две серии го оддалечија од борба за распределба на медалите, но тинејџерот од Охајо во последната реши да оди на се или ништо. Презеде ризик, изведе максимално тешки елементи пришто по секоја завршуваше на нозе што судиите знаеја да го наградат со доделување на 87,16 поени, доволни за злато на крајот.
Конкурентите што дотогаш беа подобри од него, не успеаја да го задржат нивото во завршните изведби, па дури ниту Канаѓанецот Макс Перо кој со најдобар резултат влезе во финалното возење. Неговиот перформанс при последното појавување на патеката беше оценет со 86 бода што значеа второ место на огромно задоволство кај Џерард.
Третото место го освои Марк Мекморис од Канада со 85,20 поени што ги доби во втората серија. Освоената бронза е голем успех за него ако се знае дека е освоена по, речиси, една година од стравичната несреќа во која се здоби со 17 скршеници, пробиено белодробно крило и уништена слезина.