Водата во Дојранско Езеро е комплетно исправна за капење, не предизвикува опасност по здравјето на луѓето и нема потреба од никакви ограничувања, изјави денеска министерот за здравство Никола Тодоров, при посетата на Медицинскиот симулациски центар.
– Детално го испитав случајот со моите соработници во Министерството. Прво, лабораториските анализи и резултатите кои се направени се точни, но ставени се во погрешен контекст. Ставени се во контекст на правила кои се одамна напуштени во Европска унија, односно направени се мерења кои се споредени со параметри кои повеќе не се применуваат, изјави Тодоров.
Тодоров, во однос тврдењата од Државниот инспекторат дека водата во Дојранското Езеро е од трет степен и е небезбедна за капење, посочи дека согласно направените мерења и директивите за исправност на водата за капење на Европската унија, Дојранското Езеро има исправна вода и изрази очекување дека тоа ќе биде констатирано и од надлежниот инспекторат и забраната ќе биде повлечена.
Од државниот санитарен и здравствен инспекторат за НОВА велат дека изненадени од изјавата на Тодоров. Тврдат дека нивните резултати се точни и конечни и само кратко прокоментираа „може повеќе податоци има министерот од нас. Како ќе каже министерот, очигледно така ќе биде. Не не прашувајте ништо повеќе“.
Мината недела Институтот за јавно здравје соопшти дека Дојранското езеро е загадено и издаде забрана за капење на четири плажи, на што реагираше градоначалникот на Дојран Борче Стамов барајќи дополнителни анализи.