Екс градоначалникот на општина Центар Владимир Тодоровиќ, кој е осомничен за проневера на пари за изградба на мостот „Око“ уплатил 437 000 евра на сметка на општината. Тој заедно со уште двајца – поранешен секретар во општина Центар и вработен во Секторот за уредување на градежно земјиште добија кривични пријава за злоупотреба на општинските пари.
Во текот на постапката, која ја водеше Финансиката полицијата, пријавените се согласиле да ја надоместат штетата и на 30 јуни 2018 година тие веќе ги вратиле парите на сметка на општината.
Ова не значи дека постапката против осомничените ќе запре, рече директорот на Финансиската полиција Арафат Муареми и кажа дека кривичните пријави веќе се поднесени до Основното јавно обвинителство Скопје.
„Враќањето на парите не значи амнестија за кривично дело“, рече Муареми.
Муареми најави дека освен за мостот „Око“ се водат предистражни постапки и за други објекти од проектот „Скопје 2014″.
Тој рече дека се испитува дали се префрлале пари во странство, но не сакаше да открие детали за да не влијае на текот на постапките. За дел од случаите поврзани со Скопје 2014, Арафат кажа дека соработува со Специјалното јавно обвинителство (СЈО).
Проневерени 437 000 евра за мостот „Око“
Финансиската полиција поднесе три кривични пријави за Тодоровиќ и уште двајца за „Несовесно работење во службата“.
Тие за изградба на мостот „Око“ склучиле договор со фирмата Конструктор-Инжинеринг АД за градежништво Сплит вреден 1 517 000 евра, но и Анекс кон договорот за јавна набавка со која вредноста на договорот се зголемила на 1 954 000 евра.
Првопријавениот, екс градоначалникот Тодоровиќ уплатил аванс на фирмата во висина од 400 000 евра, за што биле издадени две банкарски гаранции. Иако изведувачот не ги завршил градежните работи во утврдениот рок, наместо да ги активираат банкарските гаранции за враќање на авансот поради ненавремено и неквалитетно извршување на работите, пријавените исплатиле уште две фактури на фирмата со опис „Разлика во цени за изведени работи“ и „Трошоци поради застој на работите “ во вкупен износ од 115 000 евра.
Поради неисполнување на обрските од Договорот, како и поради неквалитено извршување на веќе изведените работи, Општина Центар го раскинала договорот со фирмата и спровела нова постапка за јавна набавка и склучила договор со нов изведувач. Поради неактивирање на банкарските гаранции за навремено и квалитетно изведување на работите, пријавените го оштетиле буџетот за речиси 437 000 евра.