Од наредната недела почнува чистењето на токсичниот инсектицид линдан, кој со децении е депониран во дворот на фабриката Охис. Рокот за негова дислокација, истекува до крајот на годинава, но со оглед на фактот што експертите предвиделе дека третманот на депонијата би можел да трае и до 18 месеци , тогаш е неизбежно тајмингот да биде пробиен. Ќе се почне со дислокација прво на малата депонија, зашто во кругот на ОХИС има и голема која се претпоставува дека содржи околу 13.000 тони линдан, кој што е покриен со околу 20.000 илјади тони земја, која досега неизбежно е и самата да се контаминирала и како таква сигурно дека претставува опасност сама по себе. Притоа не се исклучуваат ниту претпоставките ОХИС да е ,,легло“ и на трета депонија од линдан и дека него го има и во околината на Драчево во областа ,,Пеленица“.
Најглавното сепак е дека процесот тргна од мртва точка по повеќедецениска ,,парализа“, а по веќе извезените количини на винил-хлорид, на ред да ја ,,напушти“ државава стигна и линданот.
Најавата дека депонијата од линдан во Охис ќе се чисти од наредната недела, стигна од министерот за животна средина Насер Нуредини, кој не откри повеќе детали за тоа кој ќе ја чисти депонијата и каде ќе се складира односно извесува линданот. Тој ова го информира во рамките на соопштението за пакетот од шест закони од областа на управувањето со отпадот кој е влезен во собраниска процедура а денеска е на второ читање пред ресорните комисии.
По реакциите во јавноста за дозволениот увоз на РДФ-от за користење како алтернативно гориво, како неопасен нерециклирачки комунален отпад, за кој има пропишано стандарди и кој емитува значително помалку емисии на СО2 и има поеколошки животен циклус од мазутот и петролкоксот, министерот Нуредини најави дека ќе предложи измени со кои би се забранил увозот на РДФ, зашто било утврдено дека постои сомнеж оти не сме подготвени за соодветна имплементација на предвидената регулација.
,,Овие закони со кои ги транспонираме европските стандарди во управувањето со отпадот воведуваат јасни и финансиски обврски за сите производители на отпадни производи, воведуваат циркуларна економија, селекција и рециклирање, предвидуваат современ и строг регионален систем за управување со отпадот со минимално количество на депониран отпад. Овој пакет закони кој беше изработуван со години со помош на национални и странски експерти, јавно е достапен од 2019 година и беше консултиран на многу средби, на три официјални јавни расправи со физичко присуство на претставници на локалната самоуправа, комуналните претпријатија, стопанската комора, невладиниот сектор и граѓаните, чии коментари и предлози беа разгледувани и прифаќани и се исто така јавно објавени. Овие закони се можеби едни од најдолго и најшироко консултираните со јавноста, а јас не пропуштав да ги презентирам во речиси сите мои јавни настапи и гостувања“, изјави Министерот Нуредини.
По усвојувањето на шесте закони, очекувањата се Македонија конечно да почне да се справува на современ и на европски начин со својот отпад.
Мирјана Трпческа
—