Тошковски во желба да ја испочитува Единицата на интервентната полиција (поранешните Алфи) неодговорно и невнимателно присуствувал на вежба на оваа единица во која нејзините припадници симулирале лишување од слобода на лице облечено во маичка со симболот и логото каква што носеа специјалците од единицата Тигар.
„Припадниците на Специјалната Антитерористичка Единица – Тигар се чувствуваат навредени и зразуваат револт за постапката на Единицата за интервентна полиција која на 28.02.2024 година при изведување на показна вежба презентираше лишување на лице од слобода кое беше облечено во маица идентична со маиците кои порано ги носеа припадниците на САЕ-Тигар“, пишува во реакцијата на САЕ-Тигар испратена до медиумите.
Што сакале да постигнат од Единицата на интервентната полиција (поранешните Алфи) со овој гаф, и, уште повеќе, зошто Тошковски не го препознал и не реагирал на оваа провокација, останува да се чека образложение деновиве.
Со оглед на репутацијата на и на угледот на Специјалната Антитерористичка Единица – Тигар, најмалку што се очекува сега е да се извинат и „Алфите“ и Тошковски.
Фотографиите и видео инсертите од посетата на Тошковски и показната вежба се објавени на официјалните канали на Министерството за внатрешни работи, што е дополнителна причина за револтот на САЕ-Тигар, „единица којашто застануваше на браникот на одбраната на нашата држава кога тоа беше најпотребни, при што 7 припадници загинаа, а голем број беа ранети носејќи го амблемот на единицата со глава од тигар како заштитен знак“, како што се вели во соопштението на САЕ-Тигар.
Во секој случај една невообичаена, односно, многу повеќе апсурдна ситуација во структурите на МВР што ја предизвика оваа несмасна постапка на техничкиот МВР Тошковски.
Не треба да одиме натаму, но со оваа своја постапка Тошковски како да сака да покаже кој е „газда“ во неговите 100 дена како министер, па внесува ривалитет во редовите на униформираните единици на МВР таму каде што има непосредно влијание.
Имено, откако веднаш по неговото назначување за технички министер, го смени началникот на СВР Скопје, а потоа и командирот на Единицата на интервентната полиција (поранешните Алфи), која што е во склоп токму на СВР Скопје.
Ова е втор гаф во МВР откако Тошковски е технички министер, по оној од 18 февруари кога шефот на обезбедувањето на лидерот на ВМРО-ДПМНЕ, Христијан Мицкоски, Ивица Б., нападнал колега полицаец кој извршувал службени дејствија.
Дополнителниот заменик-министер за внатрешни работи Митко Бојмацалиев, кој доаѓа од редовите на СДСМ, на социјалните мрежи напиша дека македонската историја не памети ваков случај на поранешен полициски функционер да нападне и спречи свој колега во извршување на службена дејност, и побара максимално професионално да се расветли овој случај.
Техничкиот мнистер за внатрешни работи во техничката влада Панче Тошковски, кој е од редовите на ВМРО-ДПМНЕ, најави дека МВР ќе поднесе кривична пријава против Ивица Б. за напад на друго службено лице.
Според министерот, тој ќе биде суспендиран од работа сè до донесување правосилна пресуда, но не пропушти да ја изрелативизира одговорноста на Ивица Б. и рече дека не се точни наводите дека Ивица Б. спречил акција на полицискиот тим од Единицата за недозволена трговија, туку дека проверките од полицајците веќе биле завршени.
Додека го чекаме извинувањето на Тошковски до САЕ-Тигар, останува тоа што отсекогаш важело за ВМРО-ДПМНЕ – лидерите на таа партија знаат само да делат.
Всушност, ВМРО-ДПМНЕ никогаш не го научи концептот на Македонија и единствено им е важно да создаваат поделби.
Го делеа народот и на „комуњари“, „балисти“, „соросоиди“, „патриоти“ и „предавници“…
Кога не можеа другите, си ја делеа партијата на ВМРО-НП, на ВМРО Вистинска, ВМРО-Демократска партија… Го делат веќе поделеното и со секоја нова постапка се усовршуваат во (по)делбите.
Зоран Бојаровски / Рацин.мк