Претседателот на Друштвото на филмските професионалци, Горјан Тозија изјави дека донесувањето, по брза постапка, на Законот за филм, е скандалозна и ужасна постапка.
“Ова е абортус на филмот”, вели Тозија, за Вест и додава: “Со овој закон се продолжува тенденцијата на продуцирање безвредни и никому потребни македонски филмови. Зарем досегашниот неуспех и крах не беа доволна причина да се направи современ демократски закон, кој ќе одговара на филмот како комерцијална уметност. Овој закон им погодува на партиските самонаречени продуценти кои единствени направија доволен капитал за да можат, под овие услови, да се пријават на конкурсот”.
Тозија вели оти е разочаран од опозицијата, која не препозна важен сегмент за градење на имиџот на земјата и не учествуваше во расправата во гласањето за Законот.
“Сите професионалци од ДФРМ што учествуваа во разговорите и го дадоа својот максимум за да го подобрат предлог-текстот, се чувствуваат изиграно”, завршува Тозија кој потенцира дека повторно, со новиот закон моќта на одлучување останува во Министерството за култура и во Владата.
Законот за филм беше донесен во петокот по брза постапка, заедно со законите за админицтрација.