Во Кривичниот суд во Скопје продолжи судењето за случајот „Траекторија“ за провизиите за автопатите Миладиновци -Штип и Кичево- Охрид.
Судијата Горан Бошевски, кој претседава со советот, не им дозволи на медиумите на почетокот да направат снимки од обвинетите во судницата, иако за тоа се издадени уредни дозволи од Врховниот суд.
На денешното рочиште во судот треба да бидат пуштени преостанатите бомби на Специјалното јавно обвинителство.
Во „Траекторија“ обвинети се експремиерот Никола Груевски и ексминистрите Миле Јанакиески и Владимир Пешевски за злоупотреби при изградбата на автопатните делници Миладиновци – Штип и Кичево – Охрид.
Освен нив, во случајот е обвинет и поранешниот директор на Агенцијата за државни патишта, Љупчо Георгиевски.
Тие се обвинети за кривично дело „злоупотреба на службена положба и овластувањето“. Обвинети се дека во 2012 и 2013 година презеле повеќе дејства со кои во постапката за избор на компанија за изградба на автопатните делници ги пречекориле и искористиле своите овластувања, и со тоа му нанеле штета на буџетот од најмалку 155.117.172 евра.