Судскиот процес за провизиите за кинески автопати, познат како „Траекторија“ ќе продолжи на 20 март со разгледување на материјалните докази, наместо со сослушување на сведоците.
Поранешниот министер за финансии, Зоран Ставрески, е повикан како сведок во „Тракеторија“ на предлог на СЈО.
Во овој предмет на СЈО „Траекторија“, поранешниот премиер Никола Груевски, поранешниот вицепремиер Владимир Пешевски, екс министерот за транспорт и врски Миле Јанакиески и поранешниот директор на Агенцијата за државни патишта, Љупчо Георгиевски се обвинети дека во втората половина на 2012 година и во текот на 2013 година презеле повеќе дејствија со кои во постапката за избор на компанија за изградба на автопатите Миладиновци – Штип и Кичево – Охрид ги искористиле и пречекориле своите овластувања.
Судијата Горан Бошевски на почетокот на денешното рочиште го одби како неоснован предлогот на одбраната СМС пораките да бидат отфрлени како докази во постапката, бидејќи тие не можат да се ценат во оваа фаза, како и барањето аудиоснимките и вештачењата да не се користат во постапката како материјални докази поради неможноста да се потврди нивната автентичност.
Груевски, Пешевски, Јанакиески и Георгиевски денеска пред Судот се изјаснија дека го разбрале обвинителниот акт и предлог, но оти не се чувствуваат за виновни.
Обвинителката од СЈО, Лиле Стефановска, во воедниот говор рече дека обвинетиот Никола Груевски сторил кривично дело „примање награда за противзаконско влијание“, додека Јанакиески, Пешевски и Георгиевски сториле „злоупотреба на службена должност“ и побара Судот да ги прогласи за виновни и да ги казни согласно законот.
Според СЈО со противправното дејствување на обвинетите кинеската компанија „Синохидро“ се стекнала со имотно-правна корист од 155.117.256 евра, а износот на штета претставува разлика меѓу износот на цена што како држава ја плаќаме на „Синохидро“ и цената што оваа компанија ја плаќа на подизведувачите.
Стефановска, исто така, објасни дека Пешевски и Јанакиески иако примиле и разгледале дополнителна понуда од компанијата „СВЕ“ понска за 4.800.000 евра од таа на „Синохидро“, не ја доставиле до Агенцијата за патишта и не ја зеле во предвид, а ја одбрале „Синохидро“.
Одбраната, во своите воведни говори, рече дека ќе покажат дека со околностите и податоците со кои располагале обвинетите при носење на одлуките не е направено противзаконско дејствие.
Пешевски рече дека на судот ќе презентира детали и дописи, анализи и сведочења од кои ќе стане јасно како се одвивала постапката за двата автопати, појаснувајќи дека според него, се постигнати добри цени за делниците со заштеда на камати преку поволни кредити и под услови за ангажирање македонски компании и работници.
Адвокатот на Јанакиевски, Дончо Наков, рече дека само со доказите од СЈО ќе покаже дека Законот за јавни набавки е целосно применет и постапките на обвинетите се законити и дека актуелната Влада со истите услови склучиле Анекс на овој договор.
Тој исто така го оспори и вештачењето, истакнувајќи дека тоа е неосновано и незаконски направено од фирма, што СЈО ја ангажирала противзаконски и без тендер.
Обвинетиот Груевски, пред судот рече дека обвинението е правна манипулација да му се нанесе лична штета.