Published: Tuesday, May 17, 2016 14:30
Уставниот суд, на утрешната седница, да ја поништи Одлуката за самораспуштање на Собранието, со одложена примен, и истото да продолжи со работ.. Ова го побара на денешната прес-конференција претседателот на Демократскиот сојуз и пратеник – Павле Трајанов, кој вели дека нема ниту уставни, ниту деловнички пречки за Собранието да заседава.
„Демократскиот сојуз, врз основа на стручната анализа и компаративните искуства, оценува дека Одлуката за самораспуштање на Собранието (донесена на 23.02.2016), со одложена примена, ė спротивна на Уставот, здравиот разум и правната логика.
Закажаниот датум, 5 јуни 2016 година, е ништовен и на тој ден не може да се одржат избори.
Факт е дека на 23 февруари, Собранието, донесе одлука за самораспуштање, при што согласно Уставот (член 63 став 3), изборите требаше да се одржат во рок од 60 дена односно најдоцна до 23 април 2016 година.
Собранието продолжи да работи и после 23 април, и изборите не се одржаа во рокот предвиден со Устав. Поради тоа, сосема е логично дека, 5 јуни е датум кога не може да се одржат избори и затоа треба да се свика седница на Собранието и формално да се поништи решението на претседателот на Собранието на Република Македонија за одржување на вонредни парламентарни избори.
Демократскиот сојуз, во целост ги прифаќа издвоените мислења на тројцата судии на Уставниот суд (Елена Гошева, Наташа Габер – Дамјановска и Исмаил Дарлишта), кои ги прифатија аргументите на ДС, дека Одлуката за самораспуштање на Собранието со одложено дејство е спротивна на Уставот и дека Уставниот суд треба да ја прифати иницијативата на ДС за оценување на Уставноста и по неа да донесе Одлука.“ вели Трајанов.
Инаку за утре закажана е седница на Уставниот суд со точка на дневен ред „Оценување на уставноста и одлуката за распуштање на Собранието“ по иницијатива на ДУИ.
Информацијата за седницата на која ќе се расправа по оваа иницијатива е објавена утрово, на интернет-страницата на Уставниот суд и таа е единствена точка на дневен ред.
Во меѓувреме до Уставниот суд е поднесена уште една иницијатива, која се однесува на на аболицијата на 56 лица, политичари и нивни соработници, од претседателот Ѓорге Иванов, односно за преоценка на членот 11 од Законот за помилување на кој претседателот Иванов ја темели одлуката за аболиција.