Градоначалниците на општините во Македонија од утре ќе работат без мандат, информираше денеска по состанокот на Заедницата на единиците на локалната самоуправа, претседателот на ЗЕЛС и градоначалник на Град Скопје Коце Трајановски.
„Со оглед на тоа што има различни толкувања од професори или институции за тоа дали градоначалниците можат да продолжат да функционираат или не, ние како ЗЕЛС за да бидеме сигурни и да нема поделеност, бараме од Парламентот што побргу да се состане и да ги донесе измените на законот за избори и законот за локална самоуправа со што ќе се распишат следните локални избори“, истакна Трајановски.
Во име на сите загрижени градоначалници, Трајановски го поздрави договорот помеѓу политичките партии за одредување на датумот на локалните избори.
Според Трајановски, секој поминат ден без решение и нанесува голема штета на локалната власт.
„Ќе бидат доведени во прашање голем број јавни претпријатија кои добиваат субвенции од општините. Ќе не можат да се добијат градежни дозволи. Доколку имате стан, куќа или друг недвижен имот нема да можете да ги продадете бидејќи треба да се направи проценка во општините и да се плати данок на промет, а решението на данок на промет го потпишува градоначалникот“, рече Трајановски.