Американскиот претседател Доналд Трамп денеска ќе ги посети градовите Дeјтон, во Охајо и Ел Пасо, во Тексас, каде за време на викендот се случија масовни убиства во кои се убиени 31 лице.
Трамп на Твитер потврди дека ќе патува во Дејтон и Ел Пасо за како што напиша, „се сретне со најодговорните, со луѓето кои го спроведуваат законот и со дел од сведоците на ова згрозувачко насилство“.
Трамп е изложен на жестоки напади за неговиот став во однос на овие напади, во обраќањето до нацијата во понеделникот. Трамп во говорот наместо да соопшти воведување построги мерки за контрола на оружјето, тој се фокусира на проблемите со менталното здравје и за насилството ги обвини видео игрите и социјалните медиуми.
Градоначалникот на Дејтон, демократот Нан Вајли вели дека ќе го поздрави Трамп во нејзиниот службен градоначалнички кабинет, но додаде дека има намера да му каже „колку ќе биде беспомошен“ во решавањето на вооруженото насилство.
Градоначалникот на Ел Пасо, Ди Марго, исто така рече дека ќе се сретне со Трамп како дел од неговата официјална должност, но рече дека ќе ги оспори сите „штетни и неточни изјави дадени за Ел Пасо“.
Пред најавената посета на Трамп, во Дејтон се одржаа протести на кои е побарано Трамп да ја откаже посетата бидејќи не е добредојден.