Милијардерот Илон Маск, како шеф на Одделот за штедење, отпушта илјадници владини службеници во САД. Сега претседателот Доналд Трамп, реагирајќи на зголемените критики за курсот на Маск, го повикува да дејствува претпазливо.
Велиме скалпел наместо секира, напиша Трамп на својата платформа „Truth Social“. Тој го пофали Одделот на Маск, ДОГЕ (Оддел за владина ефикасност) како „неверојатен успех. Кратењата се неопходни, но прецизноста е важна за да се задржат најдобрите и најпродуктивните вработени, порача Трамп.
Ова е првпат Трамп јавно да постави ограничувања на технолошкиот мултимилијардер и неговиот владин Оддел за државна ефикасност кога станува збор за масовните намалувања на трошоците и персоналот во државниот апарат. Во меѓувреме во судовите се водат десетици процеси против кратењата. Анкетите покажуваат дека мнозинството граѓани на САД ги отфрлаат предложените масовни намалувања на државната администрација. Зад затворени врати, Трамп отиде уште подалеку со своите критики.
Тој ги потврди медиумските извештаи дека на состанокот на владата ја истакнал улогата на министрите во кадровската екипираност и политиката во нивните служби, дека тие, а не Маск, ја имаат моќта на одлучување. Технолошкиот милијардер би играл само советодавна улога. Според новинскиот магазин „Политико”, Маск бил присутен во просторијата за време на најавата на Трамп и искажал своја согласност.
Состанокот бил свикан откако шефовите на различни владини служби се пожалиле кај највисоките претставници на Белата куќа за бескомпромисниот пристап на ДОГЕ. Канцеларијата за законодавни прашања на Белата куќа во последните денови била преплавена со повици од фрустрирани републикански членови на Конгресот од целата земја, од кои некои го почувствувале гневот на нивните гласачи дома.
На прес конференцијата што следуваше, Трамп изјави дека сака министрите и шефовите на службите внимателно да разгледаат кој им е потребен, а кој не. „Не сакам големи кратења каде што се отпуштаат многу добри луѓе.
Сакам членовите на кабинетот да ги задржат добрите луѓе. А луѓето кои не си ја вршат добро својата работа, кои не се доверливи, не доаѓаат на работа и слично, може да бидат отпуштени.“ Министрите и Илон Маск ќе ги надгледуваат вработените, а ако шефовите на службите решат да кратат, тогаш Илон ќе пресече, порача Трамп.