Новиот домаќин на Белата куќа Доналд Трамп денес ја посети агенцијата ЦИА и на вработените им рече дека «1000 осто сум со вас». А потоа ги «почести» новинарите велејќи дека тие се «најнечесните човечки суштества на светот».
Посетата доаѓа на првиот ден на неговиот мандат во обид да се смири тензијата по неговите критики упатени до ЦИА во изминатите денови.
Трамп реагираше остро против објавувањето во печатот на документите за кои се уште не се знае дали се вистински во кои стоеше дека руските разузнавачи имале компромитирачки видео материјали против Трамп. Според изјавата на Трамп пред неколку дена, «скандалозно е што разузнавачите дозволиле објавување на информации кои се лажни» и додаде дека «такви работи се случувале во времето на нацистичка Германија».
«Јас ве сакам, ве почитувам. Никој не е толку приврзан до заедницата на разузнавањето и до ЦИА како Доналд Трамп», изјави Трамп. Потоа додаде дека е на иста бранова должина со нив и дека заедно «ќе правиме фантастични нешта».
Трамп сака заедно со ЦИА да се ослободи од терористичката организација Исламска држава бидејќи, како што рече «немаме друг избор».
Мајк Помпео, следниот шеф на ЦИА
Трамп го назначи Мајк Помпео како нов шеф на ЦИА но неговото именување се уште не поминало во Конгресот. Помпео е познат како остар противник на Обама и противник на Иран.
Џон Бренан, шефот на ЦИА
Актуелниот шеф на ЦИА Џон Бренан пред една недела му советуваше на Трамп да се смири во име на безбедноста на САД.
«Трамп мора да разбере дека влогот ја надминува само неговата личност, се работи за САД и за националната безбедност. Тој ќе има можност да мине во акција која ќе биде во контраст со она што го зборува и што го твитува», рече Бренан.