Претседателот на САД, Доналд Трамп ги отфрли барањата на венецуелскиот претседател Николас Мадуро за телефонски разговор, соопшти Белата куќа.
„Мадуро одби да ги послуша повиците на САД да го почитува Уставот на Венецуела, да ги ослободи политичките затвореници и да ги прекине сите нарушувања на човековите права. Наместо тоа Мадуро го избра патот на диктатурата“, се нагласува во соопштението.
САД го поддржуваат народот на Венецуела пред лицето на континуираните репресии од страна на режимот на Мадуро. Претседателот Трамп со задоволство ќе разговара со лидерот на Венецуела веднаш откако таму ќе биде обновена демократијата, додава Белата куќа.
Американската влада по изборот на Уставното собрание на крајот на јули воведе санкции против Мадуро и го замрзна неговиот имот во САД. Вашингтон оценува дека Мадуро е „диктатор“, а Уставното собрание во Венецуела го критикува како „спротивно на законот“. САД воведоа санкции и против други функционери во Венецуела.