Британската премиерка Тереза Меј и американскиот претседател Доналд Трамп во синоќешниот телефонски разговор се согласиле дека од клучно значење е да се спречи сириската Влада и понатаму да употребува хемиско оружје, се посочува во соопштението од Даунинг стрит 10.
– Меј и Трамп се согласија да продолжат блиску да соработуваат за меѓународнито одговор на употребата на хемиско оружје во Сирија, се посочува во соопштението.
Двајцата лидери разговараа откако британската Влада и даде „зелено светло“ на премиерката да им се придружи на САД и на Франција во планирањето на воена операција како одговор на наводниот хемиски напад во Сирија.
Владината седница траела два часа, на која беше поддржан планот на Меј да работи со двата сојузници на „координација на меѓународниот одговор“.
Но, Владата не прецизира време ниту обем на акцијата.
– Кабинетот е согласен со потребата да се преземе акција за да се олеснат хуманитарните проблеми и да го одврати режимот на Асад од понатамошна употреба на хемиско оружје“.
Британската опозиција побара за евентуалната воена акција да се гласа во Парламентот. Премиерката нема законска обврска да го направи тоа иако е вообичаено.
И Трамп синоќа имаше состанок со неговиот тим за национална безбедност по повод ситуацијата во Сирија, што заврши без конечна одлука за евентуален воен напад.
Портпаролката на Белата куќа, Сара Сандерс изјави дека на состанокот „не е донесена конечна одлука“.
– Продолжуваме да ги проценуваме разузнавачките информации и ангажирани сме во разговорите со нашите партнери и сојузници, посочи Сандерс.
Германската канцеларка Ангела Меркел вчера исклучи секаква можност Германија да учествува во воени напади врз Сирија.
Таа истакна дека Германија нема да учествува во воени акции против Сирија.
Меркел нагласи дека Германија ќе поддржи и ќе прави се со цел да се испрати сигнал дека е неприфатливо користење хемиско оружје.
Во Дума е употребен нервен гас
Американски претставници добија примероци од крвта и урината на жртвите на хемискиот напад во Сирија, кои поокажуваат дека во Дума било употребено хемиско оружје, објави американската телевизија Ем-Ес-Ен-Би-Си (TV MSNBC).
Според телевизијата тестовите на примероците се позитивни на хемикалии, пред се на хлор, а некои и на нервен агенс.
Во меѓувреме, сирискиот амбасадор во Обединети нации, Башар Џафри изјави дека два истражителски тима на Организацијата за забрана на хемиското оружје (ОПЦВ) треба да пристигнат во Сирија поради истрага за наводниот напад во Дума.
– Двете групи одвоено ќе пристигнат во Сирија… Подготвени сме да ги испратиме до локациите на кои сакаат да одат, посочио Џафари.
ОПЦВ потврди дека нејзини инспектори од сабота ќе почнат со работа на терен во Сирија.
Неименуван извор од сириското Министерство за надворешни работи изјави дека Западот се обидува да ја опструира задачата на мисијата на ОПЦВ и „да се вмеша во нејзината работа“.