Хамес Родригез ја напушти Шпанија и се сели во Германија. Дресот на Реал Мадрид ги менува со оној на Баерн Минхен и во него ќе игра како позајмен фудбалер во наредните две сезони за сума од 10 милиони евра. Веста за трансферот на колумбискиот репрезентативец ја потврдија и од „Алијанц арена“ со дополнување за можноста и за целосно откупување на договорот во 2019 година за 35,2 милиони евра.
„Ангажманот на Хамес Родригез беше најголема желба на Карло Анчелоти по нивната успешна соработка во Мадрид“, изјави претседателот на Баварците, Карл Хајнц Румениге.
Одличните партии и шесте постигнати гола на Родригез на Светското првенство во Бразил во 2014 година беа доволна препорака за раководството на „кралевите“ да отпочнат преговори со Монако за негово привлекување на „Сантијаго Бернабеу“. И успеаја во тоа во мандатот на Карло Анчелоти на клупата. Колумбиецот тогаш потпиша шестгодишна соработка со Реал за 80 милиони евра и под водство на Италијанецот постигна 17 гола во 46 натпревари.
Но, падна во втор план кај Зинедин Зидан, го загуби првотимскиот статус и се почесто влегуваше како резерва. Ланската сезона имаше минутажа во 22 средби и, барем засега, привремено заминува од Реал со 111 настапи, 36 погодоци и 41 асистенција.