Ништо ново кај Карпош Соколи. Ниту промената на тренерот не донесе резултат на гостувањето во Белград во осмиот натпревар во АБА лигата во оваа сезона. ФМП Железник го совлада дебитантот во регионалното кошаркарско натпреварување со 67:62 за прекинување на сопствената низа од четири порази. „Соколите“ сега имаат 0-8 и се убедливо последни на табелата. Во наредното коло се домаќини на Будуќност, екипа што заедно со Црвена звезда е со максимален ефект засега.
„Дојдовме во Белград да играме, но е успеавме да го запреме Човиќ. Ја прифатив оваа екипа и ќе се обидам да ја подигнам иако нѝ следува тежок распоред“, рече Драган Николиќ, тренер на Карпош Соколи.
Филип Човиќ беше незапирлив за Карпош. Постигна 22 коша, подели осум асистенции, имаше еден скок, блокада и „украдена топка“ и го предводеше ФМП до третиот триумф во АБА лигата. Лабовиќ и Ричардс уфрлија по 13 поени за „соколите“, Пери 12 и Врбанц 10. Составот од Белград беше подобар под обрачите за четири коша, освои повеќе топки и загуби 12, дури десет помалку од гостите од Скопје.
„Едноставно немавме среќа. Во финишот се случи и пад на концентрацијата и не успеавме до прва победа во сезоната, коментира Игор Пенов.