Еден од обвинетите за трговија со органи на Косово Љутви Дервиши, минатата есен ја продал озлогласената клиника Медикус каде што според истрагата, се вршел шверц со човечки органи. Дервиши неможел да ги плати даноците и сметките за струја обелодени пред судот во Приштина неговата одбрана.
Ова беше објавено откако минатата недела обвинителот на Мисијата на ЕУ за владеење на правото ЕУЛЕКС во случајот “Медикус“, Џонатан Рател, им наложи на полицајците на ЕУ да ја набљудуваат клиниката што се наоѓа во близина на Приштина, по добивањето на информации дека во објектот се одвиваат нови активности.
– Известени сме дека таблата со името на клиниката е сменета од “Медикус“ во “Медицинска клиника, а еден или двајца за нас познати лекари биле на клиниката“ изјави Рател.
Адвокатот на Дервиши Лин Слатенгрен, овие тврдења ги нарече „неетички“, објаснувајќи дека “на клиниката работат новите сопственици“.
-Очигледно дека тие се лиценцирани како нова клиника на која оперираат нови лекари“, рече Слатенгрен.
Во 2008 година, инспекторите ја затворија оваа приватна клиника. Зградата беше запленета со судски налог, а на Дервиши му беше забранет влез во просториите. Обвинети се поранешниот шеф на клиниката и неговиот син Арбан Дервиши, заедно со петмина други Албанци и двајца странци обвинети за трговија со луѓе, организиран криминал и незаконски медицински активности наводно вршени на клиниката.
На двајцата странци, турскиот лекар Јусуф Сонмез и израелскиот државјанин Моше Харел, им се суди во отсуство.
Обвинението беше покренато под сомнение дека на клиниката биле вршени нелегални пресадувања на бубрези.
Истрагата покажа дека биле извршени 30 илегални трансплантации на бубрег кај сиромашни лица од Турција, Русија, Молдавија и Казахстан кои биле намамени на клиниката со лажни ветувања дека ќе добијат до 15.000 евра за бубрег.
На клиниката бубрезите им биле пресадувани на богати приматели кои за еден бубрег плаќале по 70 000 евра.