#Ретвитниоброк денеска го прославува својот трет роденден.
Три години секој петок група млади луѓе готваат во просториите на „Гласност“, а донации доаѓаат од секаде.
Зготвената храна и донациите од ресторани и од граѓаните кои приготвиле храна дома, секоја сабота се споделуваат пред платото на спомен куќата „Мајка Тереза“ на оние на кои им е најпотребна.
Оваа неформална организација на граѓани секојдневно мобилизира, енергизира и помага.
Воедно, за нив тоа значи ветување кое сами си го имаат дадено себеси, но и на другите. Споделување оброци со оние кои немаат, но и споделување енергија, мотивирање и креирање начини како да се биде корисен во општеството.
-Да ни се множат повеќе институционални решенија, полесен пристап до безбедна храна и закони што ќе бидат во служба на народот, затоа што храната не е луксуз, туку секојдневие и треба да е достапна до сите, вели Ана Голјешка, една од членовите на #РетвитниОброк.
Речиси сите во групата се со различен професионален профил, но ги обединува желбата за промени и емпатијата кон луѓето кои ја немаат таа среќа и удобност за достоинствен оброк.