Тие имаа лесни симптоми на труење со чад и поради тоа проблеми со дишењето и веднаш ги ставивме на кислородна поддршка, а добија и терапија со аминофилин. Сите тројца се во стабилна здравствена состојба и вон животна опасност, изјави за НоваТВ, д-р Насер Ќафјани, кардиолог и началник на интерното одделение. Тој апелира тетовци да не излегуваат од дома, бидејќи фабриката којашто гори произведувала средства за изолација, колку што е познато, а тие материи се канцерогени кога горат.
Три лица со симптоми на труење со чад се примени денеска во тетовската Клиничка болница и се ставени на кислородна поддршка, по големиот пожар кој утринава избувна во поранешната фабрика „Македонија Табак“ во Тетово. Пожарот од предмалку почна да се гасне и со хеликоптер, а густиот чад се уште е закана по здравјето на тетовци, кои се предупредени да останат дома, да ги затворат прозорците, а ако мора да излезат надвор, задолжително да стават маска на лицето! Учениците поради пожарот и опасниот чад, кој се уште се издигнува високо над фабриката, два дена нема да одат на училиште.
Во болницата до пладне биле хоспитализирани двајца вработени во фабриката и пожарникар кој бил вклучен во гаснењето на пожарот.
– Тие имаа лесни симптоми на труење со гас и поради тоа проблеми со дишењето и веднаш ги ставивме на кислородна поддршка, а добија и терапија со аминофилин. Сите тројца се во стабилна здравствена состојба и вон животна опасност, изјави за НоваТВ, д-р Насер Ќафјани, кардиолог и началник на интерното одделение.
Во тетовската болница нема токсиколог, а засега нема да бараат помош од колеги со оваа специјалност од Скопје или од друг град.
– Ги згриживме пациентите и засега нема потреба да ангажираме и токсиколог. Апелираме граѓаните да не излегуваат од дома поради чадот, бидејќи фабриката којашто гори произведувала средства за изолација, колку што е познато, а тие материи се канцерогени кога горат. Граѓаните во Тетово да останат дома додека пожарот комплетно не биде изгаснат и добро да ги затворат прозорците, а кој мора да излезе, маска да стави задолжително, апелира д-р Ќафјани.
Вдишување чад поврзано со пожар е одговорно за повеќето случаи на труење со јаглерод моноксид.
Првиот човек на Центарот за управување со кризи, Стојанче Ангелов, изјави „во овој момент работиме на детекција на воздухот, односно дали има отровни гасови и какви. Состојбата во овој момент од аспект на отровност на гасови не е алармантна“.
Според портпаролот на СВР Тетово, Марјан Јосифоски, во 09.30 часот во СВР Тетово било пријавено дека настанал пожар во магацин за складирање на производи на тетовска фабрика, лоциран помеѓу улиците „Маршал Тито“ и „Борис Кидрич“ во Тетово.
Според првичната пријава нема повредени лица, а екипи на Територијалната противпожарна единица Тетово преземаат мерки за гаснење на пожарот.
Љубица Балабан