Три нови случаи на морбили се регистрирани во државата. Со ова, вкупниот број на заболени се зголеми на 17 , информираат од Институтот за јавно здравје. Десет од заболените живеат во населба Маџари-Кванташка депонија, две се од Чаир, едно лице е регистрирано во село Сопиште, едно е од населба Шуто Оризари и едно од село Кондово. Едно од заболените деца е од Косово и тоа било однесено на лекување во приватна болница, додека еден од новопријавените е од Прилеп со работа во Скопје.
Родителите на детето од Косово одбиле да се земе биолошки материјал за понатамошна лабораториска анализа и детето истиот ден е вратено на лекување таму. Нема податок дали било вакцинирано и со кого се било во контакт.
Од вкупниот број регистрирани случаи, 16 се лабораториски потврдени, а еден е клинички и епидемиолошки поврзан случај. Досега 13 лица биле хосипитализирани на Клиниката за инфективни болести, а едно дете било примено на лекување на Клиниката за детски болести. Во два случаи се јавиле компликации во вид на пневмонија.
Од Институтот информираат дека најголем број од заболените се деца на возраст од една до четири години, но има и две бебиња помали од една година.
„Во однос на вакциналниот статус на заболените лица, две се вакцинирани со една доза МРП (31-годишна и 44 годишна жена кои примиле прва доза вакцина на возраст од една година), едно лице е вакцинирано со две дози на МРП, а останатите не се вакцинирани (не подлежат или ја пропуштиле вакцинацијата). Притоа, четири од заболените лица се вакцинирани со една доза на МРП во текот на вакциналната кампања спроведена на при крај на септември и тоа два до пет дена пред да заболат“, информираат од Институтот за јавно здравје.
На 25 минатиот месец беше прогласена епидемија на мали сипаници на територијата на општина Гази Баба-Кванташка депонија. Со вонредната имунизација досега вакцини примиле вкупно 8.095 лица. Лекарите откриле дека 571 од нив пропуштиле да ја примат првата доза и 93 лица втора доза и сите тие се вакцинирани.
