Вардар го совлада Пелистер со 1:0 во најновата пресметка на вечните ривали во македонската фудбалска сцена. Мечот беше решен во 65 минута во која Висар Муслиу се запиша во листата на стрелци, реализација што подоцна се покажа како доволна за нови три бода на контото на „црвено-црните“.
Фудбалската претстава на „Телеком арена“ падна во сенка на прославата на 30 роденден на навивачката група „Комити“ кои направија спектакуларен пиротехнички амбиент на полувреме. Прославата ја збогати и музичката група „Некст Тајм“ со изведба на нивните познати хитови.
Но, играчкиот и резултатски успех на фудбалерите и славеничката атмосфера на навивачите на крајот лесно можеше да прерасне во инцидент од потешки размери. По последниот свиреж на главниот судија Александар Ставрев, „Комитите“ успеаја да се пробијат низ влезовите од западната трибина што водат на тревникот, да го пробијат кордонот обезбедување и да се упатат во дијагонала кон источната трибина на која беа сместени навивачите на Пелистер. До блиска средба, сепак, не дојде само поради навремената интервенција на полициските сили.
Вардар е втор на табелата со 29 бода, 11 помалку од Шкендија на лидерската позиција, но и два меча помалку од тетовските „црвено-црни“.