Новите економски предлози на Грција се основа за понатамошни преговори, оцени тројката партнери на земјата, Европската комисија, Европската централна банка (ЕЦБ) и Меѓународниот монетарен фонд (ММФ), кои ги известиле владите на државите во еврозоната за тоа.
„Трите институции ја дадоа првата заедничка процена на грчките предлози за реформи што Атина ги претстави во четвртокот навечер. Под одредени услови, трите институции ги гледаат предлозите како основа за преговори за програмата на Европскиот механизам за стабилност (ЕСМ). Оваа оцена синоќа му е испратена на претседателот на Еврогрупата“, изјави официјален претставник на ЕУ.
Оцената на Европската комисија, Европската централна банка и ММФ е предуслов за добивање на заемот со кој Грција ќе го избегне банкротот.
Грчкиот парламент во текот на минатата ноќ ги одобри новите пакет мерки врз основа на кои премиерот Алексис Ципрас треба да ги продолжи преговорите со меѓународните кредитори за продолжување на финансиската помош.