Во пукотници загинаа три лица, а ранети се најмалку 11 во густо населена област во центарот на Филаделфија, соопштија властите.
Полицајците патролирале кога слушнале повеќе истрели и биле сведоци на неколку осомничени како пукаат во голема толпа луѓе непосредно пред полноќ, изјави полицискиот инспектор на прес-конференција. Полицаец пукал во еден од осомничените од околу 9 метри, но не е јасно дали осомничениот бил погоден.
Бидејќи е викенд имало стотици граѓани кога почнало пукањето.
Двајца мажи и една жена се меѓу убиените во престрелката, соопшти полицијата. Нивните имиња се уште не се објавени. Портпаролот на универзитетската болница „Томас Џеферсон“ рече дека од 10-те пациенти кои дошле во болницата, тројца се мртви, шест се во стабилна состојба и еден бил отпуштен.
Пронајдени се два пиштоли, вклучително и еден со продолжен магацин, соопшти полицијата.
South Street е позната по местата за забава и ноќниот живот со повеќе барови, ресторани и бизниси. Надзорната снимка покажа голем број луѓе на тротоарите и на улицата кои одеднаш почнуваат масовно да бегаат откако почнува пукањето.
Очевидци велат дека сцената била „хаос“. „Луѓето бегаа испрскани со крв и со одрани колена и лакти. Им дававме салфетки натопени во вода за да се избришат“, вели сопственик на бар кој се затекнал на местото на инцидентот. (АП)