Од УХМР потврдуваат дека со температура од 34 степени сме на граница за прогласување на жолт метео аларм, но натпросечно топлото време нема многу денови да се задржи, само до петок.
Тропски горештини со температури и до 34 степени Целзиусови се очекуваат и утре и задутре, а за викенд нестабилно време со грмотевици и дожд, прогнозираат од Управата за хидрометеоролошки работи. Температурата од 34 степени во мај е гранична за прогласување жолт метео аларм, којшто сепак нема да биде активиран.
Времето денеска ќе биде сончево и многу топло со слаб до умерен ветер од јужен правец. Попладне, претежно во источните делови, ќе има изолиран развој на нестабилна облачност со пороен дожд, грмежи и засилен ветер. Максималната температура ќе достигне од 29 до 34 степени, а УВ индекот е 8. И во следните денови ќе продолжи сончево и натпросечно топло време, најавуваат од УХМР.
Граѓаните се прашуваат има ли услови за прогласување жолта предупредувачка фаза, бидејќи е мај, а веќе е натпросечно топло, со максимални температури кои што ќе се искачат и до 34 степени.
Од УХМР потврдуваат дека со температура од 34 степени сме на граница за прогласување на жолт метео аларм, но натпросечно топлото време нема многу денови да се задржи, само до петок.
– На крајот на мај и на преминот кон јуни сме кога праговите се значително повисоки. Денес и во следните два дена се очекуваат температури и до 34 степени Целзиусови, но тие нема насекаде низ земјата да бидат толку високи. Инаку, Министерството за здравство ја добива секој ден временска прогноза и незнам дали процениле дали треба да се прогласи жолта алертна фаза, ни изјави Ивана Петровиќ, дежурен синоптичар во УХМР.
Таа потврдува дека максималната температура за прогласување жолта алертна фаза е на граница.
– Да, точно е дека за мај граничната температура изнесува 34 степени, но сега е веќе крајот на мај. А веќе за јуни максималната температура за прогласување метео аларм изнесува 37 степени, но не за ослободување од работа на ризичните категории и трудниците, туку како апел граѓаните да обрнат повеќе внимание на заштита од високите температури, појаснува Петровиќ и додава дека за време на викендот нѐ очекува нестабилно време.
– Заладување ќе настапи за време на викендот, со грмотевици и дожд, веќе в сабота се очекува опаѓање на температурата, а в недела тие ќе изнесуваат од 22 до 28 степени. Очекуваме доста нестабилно време, со локално невреме, особено во вечерните часови во тие два дена, прогнозира Петровиќ.
Лекарите од скопска Служба за итна медицинска помош советуваат граѓаните да пијат доволно течности, да избегнуваат престој надвор во најтоплиот период од денот од 11 до 17 часот и задолжително да се штитат од УВ зрачењето.
(Љ.Б.)