Со дури 5 изведби на бис, македонскиот пијанист од светски глас Симон Трпчески и’ возврати на публиката во исполнетата „Концертгебау“ сала во Амстердам на настапот на 3 март. Оваа сала важи за една од најакустичните и најпрестижните сали во светот.
„Во холандската престолнина го одржав мојот трет рецитал, а втор токму во „Концертгебау“. Настапив во рамките на престижните „Мастерс пијано серии“ во кои се вклучени буквално најатрактивните пијанисти на денешницата. Величествената димензија на оваа сала и нејзината 125-годишна историја едноставно не го оставаат човек неинспириран за изведбата во неа.
Инаку, рециталот мина навистина фантастично. Свирев дела на Шуберт, на Бах и на Лист. Софистицираната публика буквално ја наполни салата и мојата одговорност беше комплетна. Но се случи истото како пред неколку години, кога публиката ме поздрави на нозе уште по првиот дел. И на крајот публиката не престануваше да аплаудира и отсвирев дури 5 биса. Дури и мене се’ уште ми е тешко да поверувам во тоа, но ете се случи и задоволството што го чувствувам не може да се опише со зборови.
Публиката во салата бурно реагираше на првата изведба во Амстердам на „На Струга дуќан да имам“ од Панде Шахов, па според интересот на промоторот, се надевам дека во иднина ќе можам да ја изведам целата негова суита „Песни и шепоти“, изјави Трпчески за Македонското радио.
Концертниот распоред веќе в недела го води нашиот пијанист во Монте Карло со тамошниот оркестар, за потоа да продолжи во Полска со дебито со Филхармонијата на Лоѓ со која освен Концерт за пијано и оркестар број 4 од Рахманинов ќе ги свири и „Фантазијата на две фолк теми“ од Дамир Имери по што следи и деби-рециталот во Варшава.