Во својот прв говор пред Генералното Собрание на Обединетите Нации, претседателот на САД, Доналд Трамп ги повика државите во светот заедно да се спротистават на заканата од како што рече тој, „режимот на Ким Јонг Ун“ кој е закана за стабилноста на светот генерално.
Воедно, Трамп упати критики и повика на одговорност и за владите на Иран, Венецуела и Сирија.
„Мораме да ги заштитиме нашите граѓани и да ги отфрлиме сите закани кои доаѓаат од надвор, а за тоа треба да работиме заедно против режимитекои ни се закануваат со тероризам. На пример режимите кои не ги почитуваат своите граѓани. Северна Кореја е закана за цел свет со својата нуклеарна програма. Целосно ќе ја уништиме Северна Кореја ако тоа биде неопходно, бидејќи за ниту една земја во светот не е прифатливо режимот таму да се наоружува со нуклеарни бомби. Време е Северна Кореја да прифати дека само денуклеаризација е правилниот начин за нејзината иднина. И им благодарам на Кина и Русија што гласаа во Советот за безбедност за санкции кон Ким“, рече Трамп.
Договорот со Иран за нуклеарната програма на државата, Трамп го нарече најголемиот срам за Америка, притоа дополнувајќи дека светот треба да бара одговорност и од тамошната влада за денуклеаризација.
„Треба целиот свет да ни се придружи и да бараме денуклеаризација од владата на Иран која пак поддржува и терористи и не ги почиртва своите граѓани како и соседните земји. Ќе дојде ден кога луѓето таму ќе треба да изберат дали сакаат да продолжат во режим или ќе се вратат на своите корени на среќа и просперитет“, потенцираше Трамп.
За Сирија рече дека тој се залага за политичко решение во политиката, но и одговорност за дејствувањето на режимскиот лидер на државата, Башар Ал Асад, за кој рече дека го шокирал секој еден совесен човек кога употребил хемиско оружје врз својот народ, вклучувајќи и деца.
Американскиот претседател се пофали дека изминативе осум месеци додека управува од Овалната соба во Белата куќа, Америка имала огромен успех против терористите на Исламската држава, од било кога претходно.
Трамп не ја испушти приликата да напомене дека САД е најголем финансиски поддржувач на земјите кои прифатија бегалци, со цел тие да останат што поблиску до матичните земји, а посебна благодарност упати кон Јордан, Турција и Либан.
Упати остра критика и кон владата на Николас Мадуро во Венецуела, нарекувајќи го корумпиран режим кој ја клекнал својата земја и граѓаните на колена.
„Подготвени сме да преземеме поголеми акции ако режимот продолжи да го загрозува својот народ“, рече Трамп.
Претседателот на САД го поздрави и генералниот секретар на ОН, Антонио Гутереш што покажал разум дека ОН има потреба од реформи ако сака да биде добар партнер во борбата против тероризмот, бидејќи претходно светската организација се занимавала со теми кои не донеле никакви промени и била фокусирана на бирократија.
Во почетокот на својот подолг говор, Трамп не испушти и да се пофали за своите постапки според кои го подобрил животот на Американците и објасни што значи неговото „Америка пред се“.
„Невработеноста во САД е на рекордно најниско ниво. 700 милијарди ќе потрошиме на војската и таа наскоро ќе биде најсилната во светот од било кога. Ние не очекуваме сите луѓе да живеат по нашите вредности, но очекуваме од сите земји да ги бранат интересите на своите граѓани и да ги почитуваат сите други држави. Јас не бев избран за да ја земам власта, туку власта да им ја дадам на граѓаните. Секогаш како претседател на Америка ќе ја ставам Америка пред се и вие лидерите на вашите земји треба секогаш да го правите тоа, бидејќи имате обврска да и служите на вашата земја“, рече Трамп.
Кон светот се обврза дека Америка ќе биде голем пријател, а најголем особено кон своите сојузници, но дека никогаш повеќе нема да дозволи да се користат нејзините ресурси без потреба.
Својот говор го заврши со повик за мир и за будење на државите во светот, за заедно да се спротистават на заканите.
„Бараме будење на сите земји. Историјата бара од нас одговор за да ги поразиме заканите на човештвото. Ќе стоиме заедно и ќе се бориме и ќе се жртвуваме за мир, за правда и за почитување на правата на сите“, порача претседателот на САД, Доналд Трамп во својот прв говор пред Генералното Собрание на ОН.