Со завршни зборови на обвинетите, утре во Кривичниот суд ќе продолжи судењето по предметот „Труст“ на Специјалното јавно обвинителство.
На денешното рочиште, што траеше речиси шест часа, завршни зборови даде одбраната на обвинетите, кои од Судот побараа ослободителни пресуди оти, како што наведоа, ниту „Трансмет“, ниту „Силекс“, ниту пак „Вато“ не ја повредиле постапката за јавна набавка, објави МИА.
Адвокатката на Сеад Кочан и „Трансмет“, Маја Дојчиновска појаснувајќи ја постапката на јавната набавка, рече дека во предметното дело не е предвидено дека е сторител на делото оној што несвесно, по грешка, поради превид и слично достави таква документација, туку бара исклучиво и само свест и намера за изигрување на договорниот орган, што во овој случај, потенцира, никако ја нема, ниту има мотив или пак потреба за тоа.
– Секој од нас греши, човечки и природно е да се греши, ако поради грешка и намерен пропуст кривично се одговара, тогаш сите ние треба да бидеме казнети, рече Дојчиновска, а пренесе МИА.
Според неа, СЈО во случајот не понудило доказ за висината на евентуалната имотна корист со која, како што рече, наводно се стекнале обвинетите, а за која бара конфискација. Таа вели дека нејасно е како бараат судот да ги задолжи обвинетите со износ од 1.060.000.000 денари.
Дојчиновска на Судот му посочи дека во овој случај може да донесе единствена пресуда, а тоа е ослободителна, но доколку по било кој основ најде вина кај обвинетите, да има предвид дека Кочан е истакната личност во општествените кругови кој со своето работење придонел за развој на стопанството и економијата, како и дека е работодавач на повеќе од 500 вработени. Адвокатката побара Судот посебно да ја цени околноста дека Кочан многу тешко го погодуваат последиците од поведената кривична постапка поради нарушување на неговиот углед и чест.
Бранителот на Сафет Васиќ рече дека обвинението против „Вато“ е неиздржано и со повеќе примери на Судот му укажа дека Сафет не знаел за никаков план за изигрување на јавна набавка и дека нема никаква поврзаност на „документот на турски јазик“ со влегување на конзорциумот во втора фаза.
Во предметот „Труст“ првоосомничен е бизнисменот Сеад Кочан и уште две физички и три правни лица, меѓу кои и управителите на фирмите „Трансмет“, „Силекс“ и „Вато“ ДООЕЛ, за учество на тендер на Електрани на Македонија.
Според обвинението, осомничените со фалсификувани документи местеле тендери во ЕЛЕМ во вредност од 17 милиони евра.