Бирото за развој на образованието нема издадено одобрение на никого за печатење примероци. Ако ми посочите каде се наоѓаат, тогаш јас тоа директно би го пријавила во Министерството за внатрешни работи, како што направив и во претходни случаи кога имав сознанија дека такво нешто се случило и каде што имаше постапување, изјави Царовска
МВР има укажувања, а и постапувања кадешто се прекршени материјалните права на авторите и на издавачите на учебници, изјави министерката за образование и наука, Мила Царовска, одговарајќи на новинарско прашање дали МОН е информирано дека во некои книжарници се продаваат комплет учебници за четврто одделение, за кое од годинава треба да се употребуваат дигитални, пренесува Alsat.mk.
Таа рече дека просветните инспектори се постојано на терен за да контролираат дали се користат фотокопирани учебници за четвртоодделенците, апелирајќи да се користат дигиталните верзии.
Посочи дека учебниците се бесплатни и се достапни на e-biblioteka.gov.mk и треба да се користат во дигитална верзија затоа што, како што рече, тоа е од највисок интерес на учениците и процесот на нивно дигитално описменување и за следење на наставни содржини проследени со мултимедија и квизови кои ги нема во печатената верзија.
– Секој родител кој се обидува на ученикот да му наметне печатен учебник прави штета, не му прави добро, затоа што користење дигитални учебници е свесно поставено така за да добиеме и подобра дигитална писменост, но и да им посочиме на учениците дека користењето електронски уреди не се само за играње, туку се и места за учење и примање знаење, истакна Царовска.
Од вкупниот потребен тираж, МОН набави 20 отсто печатени верзии на учебниците и ги има платено и пратено до училиштата за да се обезбедат учениците кои немаат електрична енергија дома, за да може да ги имаат кај себе. Одреден број примероци се за користење во училишните библиотеки.
– За сите останати, МОН набави дигитални уреди, таблети, и околу 3500 до денеска се дистрибуирани и на располагање на општините им се уште 6500 од вкупно 10-те илјади набавени. Тоа значи дека секој ученик треба да има пристап до дигитален уред, освен оние коишто немаат електрична енергија во домашни услови и за нив се обезбедени печатени, додаде министерката.
Таа одговори дека е апсолутно задоволна од одвивањето на учебната 2021/2022 година и од спремноста на училиштата и на наставниците да ги прифатат промените, а отпорите со кои, како што рече, некој се обидуваше да ги создаде вештачки, се прави само штета на образованието и на секој ученик.
Соопшти и дека вчера нови заразени во наставата со физичко присуство имало 0,01 отсто, а активни има вкупно 0,27 проценти во училиштата што, рече, укажува дека состојбата е стабилна.
Во однос на тестирањето на КОВИД-19 на околу 8200 случајно избрани основци и средношколци со цел да се добие податок за трансмисија на вирусот во училиштата, Царовска рече дека за нови детали за скринингот јавноста ќе биде навремено известена.