Од октомври 130.000 работници ќе добијат повисока плата, а за 76 илјади Владата ќе обезбеди над 547 милиони денари поддршка. Министерката за труд и социјална политика Мила Царовска во отчетот за сработеното во првите 100 дена на новата Влада ги најави измените на Законот за минималната плата од 12.000 денари.
Во првите сто дена, додаде таа, е подготвен и таканаречениот закон за стечајците, со кој се опфатени околу 3.000 лица и дека за таа намена се издвојуваат 300 милиони денари годишно.
Со измените во Законот за социјална заштита кои веќе се во собраниска процедура се регулира правото на паричен надомест за помош и нега од друго лице, додатокот за слепило и мобилност, како и додатокот за глувост, да се остварат без оглед на приходите на лицето кое има потреба од помош. Дополнително се намалуваат трошоците од вкупно 1.700 денари за конзилијарно мислење и упат кои досега ги плаќаа овие граѓани.
Министерството ја менува и праксата во однос на исплатите на средствата за социјална и детска заштита кои ќе се исплаќаат редовно.
Во отчетот за сработеното во првите 100 дена, Царовска информираше дека во изминатите 100 дена извршени биле повеќе од 300 инспекциски контроли и дека безбедноста и здравјето при работа се приоритет на Владата на Република Македонија, за што ја усвои и националната стратегија со која се предвидени конкретни мерки за подобрување на состојбите во оваа област.
Важна измена, според Царовска, има и во оперативниот план за вработување, каде се обезбедени дополнителни два милиона евра за активни мерки за вработување, а фокусот се млади лица до 29 години.
Објавен е и оглас за вработување на 29 стручни социјални работници во прва фаза, од планираните 60 вработувања за во Центрите за социјална работа низ земјата каде што има голем недостиг на стручни кадри.
Повторно ќе бидат вратени и 910 лица во системот на социјална заштита, кои претходно го изгубиле правото поради добивање пари преку брз трансфер.
Министерството за труд и социјална политика потпишало договори за поддршка на граѓански здруженија од областа на социјална заштита, кои беа избрани на јавни конкурси. Вкупниот фонд за поддршка на проекти изнесува 2.400.000 денари. Министерството обезбедило и 300 илјади евра за три центри за упатување на жртви на сексуално насилство и еден шелтер центар за заштита на жртви на сексуално насилство.