Цариградската партијаршија вчера објави дека го почна процесот за давање на независност на црквата во Украина во однос на Руската православна црква, со укинување на одлуката од 1686 година, според која Киевската митрополија и е предадена на Московската патријаршија, со што Цариградската патријаршија полага право на црквата во Украина.
– Тоа е пад на третиот Рим, рече украинскиот претседател, Петро Порошенко, истакнувајќи дека тоа е прашање на украинската безбедност, државност и светската геополитика.
По одлуката на Цариградската патријаршија денеска реагираше и Кремљ, истакнувајќи дека политички и дипломатски ќе ги брани Русите и луѓето кои го зборуваат рускиот јазик во Украина од каква било илегална активност.
Портпаролот на Кремљ, Дмитриј Песков изјави дека е многу загрижен поради обидот за раскол во православната црква.
– Ние сме запознаени со реакцијата на Руската православна црква на вчера донесената одлука од страна на Константинопол (седиштето на Вселенската патријаршија во Истанбул). Повеќе пати кажавме дека сме многу загрижени поради плановите за преземање на чекори кои би можеле да го поделат христијанскиот православен свет, наведе Песков.
Тој додаде дека „руските секуларни власти не можат да се мешаат во меѓуцрквениот дијалог, никогаш не го правеле тоа и нема да го прават во иднина“.
Цариградската патријаршија по вчерашната редовна седница на Синод, соопшти дека е укината одлуката од 1686 година, според која Киевската митрополија и е предадена на Московската патријаршија. Со укинување на таа одлука Вселенската патријаршија полага право на црквата во Украина.
Патријархот на Москва и на цела Русија, Кирил по одлуката изјави дека тоа е „легализација на расколот и оти претставува катастрофален потег со кој е помината црвената линија“.
– Во досегашната историја нема ниту еден преседан Вселенската патријаршија така отворено и категорично да се меша во прашањата на друга православна црква, истакна портпаролот на патријархот Кирил, Александар Волков.