Авторки: Светлана Јовановска и Менче Атанасова Точи
Балканската бегалска рута е затворена, но само официјално.
Неофицијално, секој ден по 100 до 150 бегалци од Идомени илегално влегуваат во Македонија. Тие наоѓаат начин како да влезат во Македонија и да го продолжат патот пеш кон Европа. Но, македонската полиција ги враќа назад. Меѓу нив има жени, деца, инвалиди, стари, изнемоштени и болни луѓе, потврдуваат за НОВА од невладините организации кои работат на терен.
Елоди Лемал, координатор на Високиот комесаријат за бегалци (ВКБ), за белгиските медиуми вели дека е јасно дека луѓето се обидуваат, а некои и успеваат, да влезат во Македонија. „Тоа го забележавме бидејќи има луѓе кои македонската полиција ги враќа назад. Овој феномен во наредните денови ќе расте и нивото на фрустрација кај луѓето е во пораст“ вели Лемал.
И од ВКБ потврдуваат дека секој ден околу стотина луѓе нелегално успеваат влезат во Македонија. И во оваа ситуација џебовите си ги полнат шверцерите кои наплатуваат 2 000 до 3 000 евра за пат од Грција до Германија. Овие луѓе оперираат во кампот во Идомени каде се уште има над 10,000 бегалци и грчката полиција не успева да го спречи овој црн пазар.
За ВКБ ситуацијата се враќа на истата состојба како на почетокот на бегалската криза со тоа што овој пат бегалците се изложени на поголема опасност поради тоа што нелегално ги преминуваат границите. Невладините организации очекуваат дека овој црн пазар ќе се зголемува во наредните недели и месеци. Бегалците се заглавени во Идомени но, и тие во Македонија немаат намера да се вратат назад во Турција или во нивните земји.
Според нивните сведочења не станува збор за враќање назад бидејќи многу од нив вложиле се што имале за да одат во Европа па сега, на половина пат, немаат намера да се откажуваат од целта.
Во Македонија во моментот има околу 750 бегалци, нивниот број е преполовен за кратко време. Според невладините организации секојдневно исчезнуваат бегалци кои илегално влегуваат во Грција или Србија од каде се надеваат дека ќе го продолжат патот кон земјите од ЕУ, поминувајќи илегално во секоја од нив.
Во Македонија,ограничена им е слободата на движење на тие што се наоѓаат во камповите во Табановце и во Гевгелија бидејќи не смеат да излезат од камповите.