Министерот за правда Никола Тупанчески денеска беше во посета на затворот Куманово, на Основниот суд и на кумановското обвинителство.
Оваа посета се случува откако претходно се спроведе акција во скопскиот затвор каде што беа запленети дрога, ножеви, пари и други недозволени предмети, како и по случајот со Хелсиншкиот комитет кој обелодени дека судијка од кумановскиот суд на рочиште во судница во која немало далечински управувач за уредот за климатизација, за да не биде загушливо во просторијата, решила да ги отстрани од судењето тужениот и претставникот на Комитетот. Овој настан предизвика големо внимание и реакции во јавноста затоа што судијката направила прекршување на Уставот и на парничната постапка.
Во соопштението од кабинетот нема детали од средбите само протоколарни информации дека министерот бил информиран од директорот Ненад Цветковиќ за состојбата во кумановската казнено поправна установа, за условите на издржување затворска казна и за проблемите со кои се соочуваат вработените.
Станува збор за установа од полуотворен вид со капацитет од 250 лица во чии рамки функционира и отвореното одделение во Крива Паланка.
Министерот Тупанчески во судот во Куманово се сретнал со судијката Снежана Манев, в.д. претседателка на овој суд, а го посетил и тамошното обвинителство каде разговарал со Основниот јавен обвинител, Теута Бедиу Рамадани.
– На средбите министерот беше информиран за состојбите во овие институции а на вработените им беше порачано дека Министерството за правда преку реформите во судството се грижи за унапредување на нивните права. Доказ за тоа е сетот од 4 закони кои Владата неодамна ги усвои а со кои се зголемуваат платите за 15 отсто, се вели во информацијата од Министерството за правда. (С.М.)