Почнувајќи од оваа и од идната недела започнува процесот на донесување нов Изборен законик, најави министерот за правда, Никола Тупанчевски, на денешната прес конференција.
Тој појасни дека тоа значи дека ова е консеквенца на тоа што се случуваше во 2015 година, кога беше формирана меѓуресорска работна група која во 2016 година започна со активностите, а последните беа во април 2021 година.
– Идејата е од Министерството за правда иницијално да тргне процесот за подготовка на нов Изборен законик, кој би значел вградување на сите препораки од меѓународниот фактор, пред се од ОДИХР/ОБСЕ, меѓутоа и забелешките од другите засегнати страни, посочи Тупанчески.
Оваа недела, нагласи министерот, до сите засегнати страни ќе биде испратен допис во кој, пред се, политичките партии ќе бидат поканети да учествуваат во подготовката на Изборниот законик.
Тој најави дека ќе бидат поканети и другите засегнати страни, односно невладините организации, здруженија и сите кои се поврзани на некој начин со изборната проблематика.